Згарэлы «Крокус Сіці Хол» трапіў у заклад да банка сяброў Пуціна

Падрабязнасці.

Канцэртная зала «Крокус сіці хол», якая згарэла ў выніку тэракту 22 сакавіка, знаходзіцца ў закладзе ў Газпрамбанка (ГПБ). Пра гэта сведчыць выпіс з Адзінага дзяржаўнага рэестра нерухомасці (АДРН), піша a target="_blank" href=https://www.rbc.ru/finances/27/03/2024/66031a4d9a7947d7aeb464ff>РБК.

Будынак плошчай больш за 38 тысяч м² належыць АТ «Крокус Інтэрнэшнл» – галаўной структуры Crocus Group бізнэсмэна Араза Агаларова. Ён быў закладзены паводле іпатэчнай дамовы ў лістападзе 2023 года, абцяжаранне на нерухомасць дзейнічае да 24 снежня 2032 года.

У заклад Газпрамбанку канцэртная пляцоўка патрапіла ў выніку пераўступкі ў снежні 2022 года. Да гэтага крэдыторам аб'екта быў Ашчадбанк. Паводле інфармацыі крыніцаў выдання, холдынг Агаларава рэфінансаваў крэдыты прыкладна на 100 млрд рублёў.

З улікам маштабаў разбурэнняў будынка ліквідацыйны кошт закладу знізіўся і «цяпер яго можна ацаніць на 20–30% ад першапачатковага», мяркуе незалежны аналітык Андрэй Бархота. У выпадку абясцэнення закладу ГПБ можа запатрабаваць ад пазычальніка падаць на пазыку дадатковае забеспячэнне, адзначае эксперт у пытаннях банкаўскай справаздачнасці і кіравання банкаўскімі рызыкамі Сяргей Няклюдаў.

Акрамя канцэртнай залы, у закладзе Газпрамбанка знаходзяцца іншыя актывы бізнэсмэна: выставачны цэнтр «Крокус Экспа», гандлёвы цэнтр «Крокус Сіці Мол» і забаўляльны цэнтр «Крокус Сіці», вынікае з АДРН.

Газпрамбанк на 40% належыць «Газфонду» – некамерцыйнай арганізацыі, якой, у сваю чаргу, толькі на 40% валодаюць сам «Газпрам» і ягоныя даччыныя структуры. Найбуйнейшым жа акцыянерам банка з'яўляецца блізкі да прэзідэнта мільярдэр Юрый Кавальчук, якога Мінфін ЗША называў «асабістым касірам» Уладзіміра Пуціна, змяшчаючы ў санкцыйныя спісы ў 2014 годзе.

Фактычна Газпрамбанк кантраляваў «Крокус Інтэрнэшнл». У канцы снежня ў картцы АТ на Федрэсурсе з'явілася паведамленне пра накладанне вета крэдытора. Сярод іншага, ГПБ абавязаў некаторыя структуры «Крокуса» атрымліваць папярэднюю згоду на скліканне агульнага сходу заснавальнікаў і выносіць пастановы толькі з ухвалы банка. Гэта закранула пытанні змянення статута і статутнага капіталу, размеркавання чыстага прыбытку, ліквідацыі або рэарганізацыі кампаніі, размяшчэння аблігацый і акцый, куплі і продажу акцый іншых кампаній, а таксама ўгодаў памерам больш за 100 млн руб.

Акрамя таго, Газпрамбанк атрымаў права ўзгадняць любыя ўгоды з кампаніямі, якія ўваходзяць у групу «Крокус», уключаючы адчужэнне або куплю маёмасці, выдачу або атрыманне крэдытаў памерам больш за 50 млн рублёў штогод, вылучэнне іншым кампаніям забеспячэння якой-небудзь маёмасцю або акцыямі, а таксама дамовы арэнды і лізінгу памерам больш за 50 млн руб. штогод.

Паводле звестак «СПАРК-Інтэрфакс», прыбытак галаўной структуры Crocus Group у 2022 годзе склаў 47,2 млрд руб., чыстыя страты – 6,7 млрд руб. На думку экспертаў, шкода ад тэракту можа дасягаць 12 млрд руб. Пры гэтым гадавы абарот пляцоўкі ацэньваецца на 4 млрд руб. Будынак «Крокуса» быў застрахаваны «Індзяржстрахам». У кампаніі паведамілі, што выканаюць усе свае абавязальніцтвы перад кліентамі.