Калі для Лукашэнкі наступяць чорныя часы

Міхаіл Падаляк назваў адзіны фактар выжывання дыктатара.

Аляксандру Лукашэнку патрэбнае замарожванне канфлікту ва Украіне? «Зеркало» абмеркавала рыторыку дыктатара з дарадцам кіраўніка Офіса прэзідэнта Украіны Міхаілам Падаляком.

- Лукашэнка зноў загаварыў аб перамовах паміж Расеяй і Украінай: «Спыніцеся цяпер. Ёсць магчымасць дамовіцца. Дэнацыфікацыя, дэмілітарызацыя і іншае - гэта тэрміны. Пра гэта ўсё дамаўляюцца за сталом перамоў». Навошта беларускі палітык гэта робіць? Ён транслюе тэзу Крамля?

- Так, тут некалькі вельмі важных частак. Першае: Лукашэнка паўтарае адно і тое ж, напэўна, раз ужо 15-ты, наконт «зараз самы час спыніцца» і гэтак далей. Безумоўна, зараз самы час спыніцца, як, уласна, у кожны момант можна было б спыніцца, калі б Расейская Федэрацыя перастала ўважаць сябе за значную краіну, якая мае права заходзіць на суверэнную тэрыторыю, знішчаць мірнае насельніцтва, разбураць інфраструктуру. У кожны момант можна ўсё спыніць, калі Расейская Федэрацыя выйдзе, нарэшце, з тэрыторыі Украіны. Гэта несумненна. Усё астатняе не мае ніякага значэння.

Другое: усе банальныя тэзісы, якія агучвае Лукашэнка, цалкам кладуцца сёння ў ключавую канву расейскай прапаганды. Я, шчыра кажучы, прапаную не рэагаваць на яго заявы. Ён не з'яўляецца суб'ектам не тое што нават глабальнай палітыкі, а рэгіянальнай. Ён не ўплывае ні на якія працэсы - ні ў рэгіёне, ні ў рамках вайны Расеі і Украіны. І, у прынцыпе, ні на што не ўплывае. Лукашэнка - гэта такі VIP-прапагандыст вельмі местачковага ўзроўню, і яго заявы нічога не значаць.

- Аляксандру Лукашэнку выгаднае замарожванне канфлікту?

- Для Лукашэнкі замарожванне канфлікту - гэта фундаментальнае пытанне нават не палітычнага выжывання, а ў прынцыпе выжывання. Бо як толькі сітуацыя будзе мяняцца ў правільным кірунку, то бок, вайна будзе фіналізавацца справядліва, Расея пойдзе на абавязковую трансфармацыю, гэта важна для еўрапейскай бяспекі агулам. Калі мы гаворым пра фінал вайны, трэба казаць ужо не пра тэрыторыі, а пра важнасць трансфармацыі палітычнай сістэмы ў Расеі. Уся пуцінская эліта павінна сесці на лаву падсудных, ёй трэба будзе прайсці праз пэўныя міжнародныя юрысдыкцыі, трыбуналы для таго, каб усё гэта сапраўды скончыць - не толькі поўнамаштабнае ўварванне, але і першую вайну ва Украіне, і вайну ў Грузіі, і астатнія рэпрэсіўныя дзеянні Расеі цягам усяго пуцінскага тэрміна кіравання. Вядома ж, гэта прывядзе да істотнай змены сітуацыі ў самой Беларусі. І Лукашэнка гэта цудоўна разумее.

Адзіны фактар выжывання Лукашэнкі - гэта захаванне таго тыпу палітычнай канструкцыі, якая ёсць сёння ў Расеі, гэта значыць, пуцінскай Расеі. Як толькі канфлікт будзе справядліва фіналізаваны, для Лукашэнкі надыходзяць чорныя часы. І таму ён зацікаўлены ў трох рэчах.

Першае - гэта каб Расея не саступіла. Другое — каб канфлікт быў абавязкова замарожаны, бо тады Расея будзе паводзіць сябе агрэсіўна і Лукашэнку можна будзе падтрымліваць гэтую агрэсіўную рыторыку ў дачыненні да Польшчы, Літвы, розных краін рэгіёну. І трэці складнік - Лукашэнка як адзін з найбліжэйшых хаўруснікаў Расеі будзе атрымліваць у рамках экспансіянісцкай замежнай палітыкі Масквы дывідэнды, гэта значыць, фінансаванне, магчымасць мадэрнізаваць свае ўзброеныя сілы і ўсе астатнія заахвочванні, якія заўсёды выплачвае васалу агрэсіўная экспансіянісцкая краіна.