Навукоўцы: іншапланецяне могуць трапіць да нас праз парталы

Сонечная сістэма мае значна большы памер.

Два вядучыя спецыялісты ў галіне касмічных даследаванняў сцвярджаюць, што межы Сонечнай сістэмы трэба перагледзець. Паводле іх тэорыі, улік гравітацыйнага поля Млечнага Шляху дазваляе па-новаму вызначыць межы ўплыву Сонца.

Таксама навукоўцы лічаць, што разумныя іншапланецяне маглі б трапіць у Сонечную сістэму праз спецыяльныя парталы. Артыкул апублікаваны ў часопісе ROOM — The Space Journal of Asgardia, піша Space (пераклад — «Фокус»).

Новую тэорыю прапанавалі Джым Грын, былы навуковец NASA, і Эд Белбруно з Прынстанскага ўніверсітэта, ЗША. Навукоўцы лічаць, што гравітацыйная мяжа Сонечнай сістэмы цягнецца амаль на 3,8 святловага года ад Сонца, а гэта прыкладна 241 000 астранамічных адзінак. Гэта ў 241 тысячу разоў больш за адлегласць паміж Сонцам і Зямлёй, і такую дыстанцыю можна параўнаць з адлегласцю, што аддзяляе Сонца ад найбліжэйшых зорак. Напрыклад, зорка Проксіма Цэнтаўра знаходзіцца прыкладна за 4 святловыя гады ад нас.

Цяпер мяжой Сонечнай сістэмы лічаць месца, дзе сонечны вецер сустракаецца з міжзоркавым асяроддзем. Яна знаходзіцца на адлегласці прыкладна 120 астранамічных адзінак ад нас. Але калі ўлічваць Воблака Оорта, то мяжа знаходзіцца на адлегласці прыкладна 100 000 астранамічных адзінак, або амаль 1,5 святловага года. Лічыцца, што там заканчваецца гравітацыйны ўплыў Сонца.

Аўтары новай тэорыі мяркуюць, што мяжу Сонечнай сістэмы варта разглядаць не як выразную рысу, а як вынік складанага ўзаемадзеяння сіл, энергій і траекторыяў руху.

Згодна з тэорыяй, гравітацыйна стабільныя кропкі Лагранжа L1 і L2 у сістэме Сонца — Млечны Шлях могуць служыць своеасаблівымі парталамі. Праз іх у Сонечную сістэму могуць трапляць міжзоркавыя аб'екты, такія як вядомая камета 3I/ATLAS. У будучыні навукоўцы маглі б выкарыстоўваць гэтыя кропкі для захопу такіх аб'ектаў з мэтай іх далейшага даследавання.

Навукоўцы лічаць, што Сонца сваёй гравітацыяй можа прыцягваць да сябе міжзоркавыя аб'екты, якія трапляюць у гэтую гравітацыйна стабільную вобласць космасу, і такім чынам яны могуць стаць часткай Сонечнай сістэмы. Гэта датычыцца і вандроўных планет. Такім чынам, у будучыні ў Сонечнай сістэме можа аказацца больш планет, чым цяпер.

Навукоўцы лічаць, што гэтыя кропкі Лагранжа трэба даследаваць з дапамогай касмічнага апарата NASA «Новыя гарызонты», які цяпер знаходзіцца далёка за арбітай Плутона.

Таксама даследчыкі ўдзялілі ўвагу ў сваім артыкуле і патэнцыйным пазаземным цывілізацыям. Па словах астраномаў, міжзоркавыя пералёты патрабуюць умення кіраваць гравітацыяй. Развітая пазаземная цывілізацыя магла б выкарыстоўваць гэта для падарожжаў па Млечным Шляху з дапамогай парталаў, створаных у кропках Лагранжа.

Такім чынам, разумныя іншапланецяне, калі яны існуюць, могуць пранікаць у Сонечную сістэму праз гэтыя парталы і нават ствараць станцыі назірання ў кропках Лагранжа сістэмы Сонца — Млечны Шлях. Даследчыкі лічаць, што назіранні за гэтымі месцамі ў космасе могуць дапамагчы выявіць доказы існавання пазаземных цывілізацый.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com