Апалчэнне не ўратуе Лукашэнку

Кіраўнік рыхтуецца да мінулай вайны.

16 кастрычніка Аляксандр Лукашэнка інспектаваў трэніроўку аднаго з атрадаў так званага народнага апалчэння. І растлумачыў свой стратэгічны задум:

«Чаму я імкнуўся стварыць народнае апалчэнне? Я не хачу, каб тут кожны другі загінуў, як гэта было калісьці ў гады Вялікай Айчыннай вайны. Палавіну насельніцтва выразалі, а мы нічым не адказалі. А гэтыя хлопцы заўсёды адкажуць».

Таксама прагучала, што падобныя атрады павінны быць створаныя ў кожным сельсавеце.

Паказуха для вождзя

Звярніце ўвагу: калі раней Лукашэнка казаў, што падчас той вайны загінула трэця насельніцтва, то цяпер ужо вядзе гаворку пра палову. Няўжо так хочацца завысіць колькасць ахвяр, каб яшчэ раз тыцнуць у іх носам еўрапейцаў, якіх аўтакрат без разбору называе нашчадкамі Трэцяга Рэйху?

Другі момант: Лукашэнку паказалі нейкае ўзорнае фарміраванне пад кіраўніцтвам былога спецназаўца, які рэгулярна ездзіць з Мінска ў далёкі раён трэніраваць гэтых арлоў. Яны нават кіраванню беспілотнікамі навучаюцца. І амуніцыя з іголачкі.

Але ж за кожным сельсаветам спецназаўца не замацуеш і беспілотнікаў на ўсіх не набярэшся. Дык што ў гэтым выпадку пахне звыклай паказухай. А ступень баяздольнасці большай часткі «апалчэння» выклікае сумневы.

І, дарэчы, наконт амуніцыі. Высветлілася, што гэты атрад экіпаваў бізнесмен Мікалай Варабей, якога называюць кашальком Лукашэнкі. Апошняму гэта спадабалася. Ён заявіў, што хоча тыражаваць гэты досвед на ўсю краіну.

Такім чынам, цалкам можна чакаць, што з шараговых прадпрымальнікаў, якіх то і справа абдзіраюць як ліпку, пачнуць трэсці грошы яшчэ і на «апалчэнне».

«Пацешныя палкі» не ўратуюць

Лукашэнка нагадаў «апалчэнцам»:

«Тут у вас паблізу краіна НАТА. Не дай Бог, вядома, каб нам давялося з імі ваяваць. Але тым не менш мы павінны быць гатовыя». З краін Альянсу найбліжэйшая да Верхнядзвіншчыны — Латвія. Страшны НАТАўскі монстар! Калі ж сур'ёзна, дык там, наадварот, пабойваюцца, што можа напасці Расія.

Лукашэнка ж, як бачым, фактычна праводзіць паралель паміж гітлераўскім нашэсцем і магчымай, на яго думку, агрэсіяй з боку Паўночнаатлантычнага альянсу. Нібыта НАТАўская Арда, як калісьці нацысцкая, рушыцца на нашыя землі — і вось тады «апалчэнцам» наканавана біцца за кожную вёску і кожны дом.

Але ж у НАТА рыхтуюцца да іншага сцэнара. На Варшаўскім форуме бяспекі 12 кастрычніка галоўнакамандуючы Аб'яднанымі сіламі Альянсу ў Еўропе, амерыканскі генерал Алексус Грынкевіч прадставіў так званую тэорыю перамогі — канцэпцыю дзеянняў у выпадку нападу на краіну НАТА.

Паводле слоў Грынкевіча, Альянс мае намер спыніць першапачатковае нападзенне, не дапусціць далейшага прасоўвання праціўніка, а пры патрэбе — разбурыць усю сістэму, што забяспечвае вядзенне вайны. Генерал не ўдакладніў, дзе менавіта і якімі сродкамі НАТА можа наносіць удары.

Тым часам, паводле The Wall Street Journal, у межах гэтай канцэпцыі прадугледжваюцца магчымыя ўдары ракетамі вялікай далёкасці па расійскіх камандных пунктах і аб'ектах СПА ў Калінінградскай вобласці, паблізу Санкт-Пецярбурга і ў Беларусі.

І калі, не дай Бог, пачнецца такая заваруха, то натоўцы наўрад ці будуць асабліва разбірацца, дзе там расійская СПА, а дзе беларуская. Ды ўвогуле вайна ёсць вайна: ракета можа прыляцець куды заўгодна. Таму ў выпадку эскалацыі нікому мала не падасца. І ніякае «апалчэнне» ад тых ракет не абароніць.

Тое самае датычыць і варыянта гарачага беларуска-ўкраінскага канфлікту. Кіеў не рушыць свае войскі на тэрыторыю паўночнай суседкі, але можа ўчыніць пекла сваімі ракетамі і дронамі. Лукашэнка ў чэрвені прызнаў, што беларуская тэрыторыя «вельмі ўразлівая ў ваенным плане, калі Украіна пачне атакаваць Беларусь так жа, як яна атакуе Расію, бо Беларусь для ўкраінскіх вайскоўцаў як на далоні».

Мараль тут такая. Каб не трапіць пад раздачу — або ад НАТА, або ад украінцаў, — не трэба ўвязвацца ў вайсковыя саюзы з захварэлай імперыяй. Але ж Лукашэнка тут — шчупак у мярэжы. І аўтакрату застаецца толькі суцяшацца ілюзіяй, што ў выпадку чаго ўратуюць «пацешныя палкі». Не, не ўратуюць.

Аляксандр Класкоўскі, «Белсат»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com