СМІ: Лукашэнка прадае талібам зброю і беспілотнікі

Пасрэднікам у здзелках можа выступаць Індыя.

Талібы набываюць у рэжыму Лукашэнкі ўзбраенне і беспілотнікі. Пра гэта паведаміў афганскі апазіцыйны тэлеканал Afghanistan International, са спасылкай на пяць былых высокапастаўленых чыноўнікаў, сярод якіх ёсць і былыя афганскія чыноўнікі ў сферы бяспекі.

Паводле іхніх звестак, Індыя выступае ў гэтых здзелках пасрэднікам і фінансуе іх, а Расія дала на іх згоду. Пра гэта ў эфіры распавяла карэспандэнтка тэлеканала ў Вашынгтоне Самсама Сірат. Яна нагадала, што ў апошнія месяцы візітаў паміж прадстаўнікамі талібаў і Беларусі стала больш.

Крыніцы сцвярджаюць, што гэтыя кантакты пачаліся пасля візіту ў Маскву міністра абароны талібаў мулы Якуба, які адбыўся на мяжы мая і чэрвеня. Тады ён падпісаў з Расіяй пагадненне ў сферы бяспекі. Расійскія чыноўнікі ж заяўлялі, што пагадненне датычыцца рамонту расійскай тэхнікі, якая засталася ў Афганістане.

Чалавек, блізкі да талібаў у Кабуле, таксама пацвердзіў тэлеканалу, што бакі дамовіліся і што гэта адбываецца па ўказанні Расіі і пры яе каардынацыі.

Паводле звестак Afghanistan International, талібы хочуць мець дроны і ўзбраенне, каб умацаваць сваю абарону ад Пакістана: апошнім часам адносіны паміж краінамі абвастрыліся. Карэспандэнтка падкрэслівае, што Беларусь «ні ў якім разе» не прадала б талібам ваенную тэхніку, тым больш дроны, без узгаднення з Расіяй.

Пры гэтым Расія — саюзніца Пакістана і, на думку журналісткі, наўрад ці гатовая памяняць Пакістан на талібаў. Калі ў Пакістане адбываюцца нападэнні, і Ісламабад абвінавачвае ў іх групоўкі, што базуюцца ў Афганістане пад апекай талібаў, Масква асуджае гэтыя нападэнні і заклікае да сумеснай барацьбы з тэрарызмам. А вось пакістанскія ўдары па Афганістану Расія не асудзіла ні разу.

Тэлеканал нагадвае, што падобная схема ўжо дзейнічала пры папярэднім урадзе Афганістана. Паводле слоў былога высокапастаўленага чыноўніка ў сферы бяспекі з урада Ашрафа Гані, тады Індыя набывала ў Беларусі верталёты для афганскага ўрада. Акрамя таго, яна рамантавала частку ўласнай тэхнікі з дапамогай беларускіх магутнасцяў і перадавала яе Кабулу. Паводле дадзеных крыніцы, цяпер талібы хочуць паўтарыць тую ж схему праз Індыю.

Самсама Сірат таксама адзначае, што Індыя — адзіная краіна, якая адкрыта падтрымлівае талібаў у супрацьстаянні з Пакістанам. Нью-Дэлі асуджае пакістанскія ўдары па Афганістану як парушэнне яго суверэнітэту і неаднаразова заяўляў пра гэта на міжнародных сустрэчах. Журналістка нагадвае, што былы ўрад меў міжнародную легітымнасць дзякуючы падтрымцы ЗША і НАТА. Талібы ж, згодна з дакументамі Савета Бяспекі ААН, звязаныя з тэрарыстычнымі групоўкамі, таму краіны, якія пастаўляюць ім зброю, бяруць на сябе вялікую адказнасць.

Апошнім часам Мінск актыўна развівае адносіны з талібамі. У жніўні ў Беларусь на пяць дзён прыязджала дэлегацыя з 13 чалавек на чале з выконваючым абавязкі міністра сельскай гаспадаркі талібаў Атаулой Амары. Яна ўдзельнічала ў другім пасяджэнні беларуска-афганскай камісіі па гандлёва-эканамічным супрацоўніцтве. Паводле слоў прэс-сакратара талібаў Забіхулы Маджахіда, талібы ўхвалілі беларускага пасла па сумяшчальніцтве. Служба знешняй разведкі Украіны заявіла, што Мінск апусціў сваю дыпламатыю «да ўзроўню тэрарыстаў».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com