Агенты Пуціна праніклі ў дамы фінскіх дэпутатаў і пакінулі там экскрэменты

Расійскія спецслужбы адрадзілі метады КДБ.

Пуцінскія спецслужбы даўно адрадзілі метады КДБ, уключна з пранікненнем у жыллё тых, каго яны лічаць ворагамі, і цяпер выкарыстоўваюць іх у межах сваёй гібрыднай вайны ў Еўропе. Каля 20 дэпутатаў парламента Фінляндыі паведамілі пра загадкавыя выпадкі пранікнення ў іх дамы, прычым адзін з палітыкаў выявіў у прыбіральні пакінутыя там экскрэменты, паведамляе The Telegraph.

Старшыня парламента Юссі Халла-ахо назваў «істотнай» колькасць падазроных выпадкаў, што адбыліся яшчэ летась. Паводле ягоных слоў, у кватэрах палітыкаў былі пакінутыя сляды, якія сведчылі, што там хтосьці пабываў, хоць прыкмет узлому не выяўлена, таксама нічога не было скрадзена або пашкоджана. Бэн Зысковіч, высокапастаўлены дэпутат ад кіруючай партыі «Нацыянальная кааліцыя», лічыць, што такім чынам расійскія спецслужбы хочуць запалохаць фінскіх заканадаўцаў, прадэманстраваць, што за імі «вядзецца назіранне, выклікаць у іх замяшанне або непакой».

Пасля таго як Пуцін развязаў вайну ва Украіне, Фінляндыя адмовілася ад даўняй палітыкі нейтралітэту, уступіла ў НАТА і актыўна падтрымлівае Кіеў. Прэзідэнт Аляксандр Стуб паслядоўна выступае за ўмацаванне альянсу і цвёрдае супрацьстаянне Расіі. Выпадак з пранікненнем у дамы дэпутатаў стаў першым у Фінляндыі. Але такую тактыку КДБ выкарыстоўваў з 1960-х гадоў, піша ў сваёй кнізе «Мафіёзная дзяржава» журналіст The Guardian Люк Хардынг.

ФСБ узяла яе на ўзбраенне: агенты спецслужбы ўламваліся і ў кватэру Хардынга, калі ён працаваў у Маскве. Незадоўга да таго, як у 2011 годзе ён стаў першым у постсавецкай гісторыі замежным журналістам, высланым з Расіі, яны пакінулі там кіраўніцтва па сексе.

Былая карэспандэнтка «Бі-бі-сі» Сара Рейнсфард у сваіх мемуарах «Развітанне, Расія» ўзгадвае, што агенты ФСБ праніклі ў яе кватэру і ў якасці «візітоўкі» пакінулі «вялікі нязмыўны след у кожным унітазе».

Найбольш гучным прыкладам такіх дзеянняў, верагодна, з'яўляецца выпадак, пра які ў 2023 годзе распавядала The Wall Street Journal: агент ФСБ спражніўся ў чамадан высокапастаўленага амерыканскага чыноўніка падчас ягонага візіту ў Расію.

Расійскія спецслужбы і прапагандысты выкарыстоўваюць брудныя метады, у тым ліку ў дачыненні да палітыкаў, і ў іншых краінах НАТА. Апошнім часам такія прыклады назіраліся ў Эстоніі, дзе ў верасні праходзілі прэзідэнцкія выбары, і Латвіі, дзе 3 кастрычніка адбыліся парламенцкія выбары, адзначае Euronews. У Эстоніі на фэйкавым сайце euobserver.news, аформленым пад брусэльскае выданне EUobserver, з'явіўся сфабрыкаваны артыкул, які звязваў прэзідэнта, што сыходзіць у адстаўку, Алара Карыса, а таксама прэзідэнта Літвы Гітанаса Наўседу з мільянерам Джэфры Эпстайнам.

У Латвіі ў сфальсіфікаваным відэа, замаскіраваным пад рэпартаж Euronews, распавядалася, быццам украінскі салдат забіў траіх вайскоўцаў НАТА падчас вучэнняў Baltic Trust 26, а затым скончыў жыццё самагубствам. Заяўлялася, што з гэтай прычыны вучэнні былі прыпынены, хоць у рэчаіснасці яны завершыліся паводле графіка. Нацыянальныя ўзброеныя сілы Латвіі абверглі гэтае паведамленне, якое сабрала больш за 1,85 млн праглядаў і актыўна абмяркоўвалася ў прарасійскіх супольнасцях; Euronews заявіў, што не выпускаў такога рэпартажа.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com