Экс-палітзняволены пагадзіўся быць «агентам» КДБ і з’ехаў у Польшчу

Вадзім Пашкоўскі распавёў пра вербаванне.

Былы палітзняволены Вадзім Пашкоўскі пагадзіўся супрацоўнічаць з КДБ, каб выехаць з Беларусі ў Польшчу, дзе, паводле задумкі сілавікоў, павінен быў выконваць «заданні». Пра гэта мужчына распавёў «Гомельскай Вясне».

Пасля вызвалення ў снежні 2025 года Вадзім уладкаваўся на працу па спецыяльнасці ў прыватнае прадпрыемства міжнароднага канцэрна Kronospan у Магілёве. Але ў яго не склаліся стасункі з дырэктарам прадпрыемства, і мужчына вырашыў звольніцца. Калі кіраўніцтва запрасіла яго забраць падпісаную заяву, у кабінеце, куды прыйшоў Вадзім, яго чакалі двое мужчын у цывільным.

«Гэтыя людзі не паказалі мне ніякіх дакументаў, сказалі, што нам трэба паехаць пагаварыць. Мяне пасадзілі ў машыну і прывезлі ў будынак упраўлення КДБ па Магілёўскай вобласці. Тады я зразумеў, хто гэта. Я пытаў у іх, што здарылася, што я нарабіў, але яны не адказвалі. Ужо ў кабінеце ў КДБ яны пыталіся ў мяне, за што я сядзеў, ці атрымліваў я нейкую дапамогу ад праваабарончых арганізацый, ці атрымліваў прадуктовыя перадачы. Потым мяне павезлі ў іншы будынак, і там я праходзіў паліграф. Там ужо пыталіся, ці звязаны я з замежнымі спецслужбамі, ці займаюся «экстрэмісцкай» дзейнасцю і ўсё такое. Пасля паліграфа мяне адвезлі на знятую кватэру, дзе я жыў у Магілёве. Там яны правялі вобшук. Але гэта адбывалася без панятых, без якіх-кольвек санкцый: яны проста самі зайшлі, усё перарылі. Забралі ў мяне ноўтбук, тэлефон», — распавёў Вадзім.

Пасля гэтага яго зноў прывезлі ў КДБ і сказалі, што ў ноўтбуку знайшлі «шмат файлаў, што даюць падставы падазраваць прамысловы шпіянаж».

«І таму яны сказалі: «Або на 15 гадоў, або трэба будзе дапамагчы краіне». Я сказаў, што не хачу ў турму. І яны мне сказалі: «Тады цяпер вяртайся дадому, мы з табой звяжамся». Гэта было 30 ліпеня. І я паехаў дадому ў Жлобін. А 3 жніўня яны мне сказалі вярнуцца назад у Магілёў і чакаць сустрэчы», — распавёў былы вязень.

Пры наступнай сустрэчы супрацоўнікі КДБ сказалі мужчыну, што ён павінен паехаць у Польшчу і «проста жыць там, кантактаваць з людзьмі і перыядычна распавядаць ім, як у яго справы і з кім ён кантактуе». Таксама яму даслалі спасылкі на праваабарончыя арганізацыі, у якія Вадзім павінен быў напісаць.

«Я напісаў у BYSOL, бо яны сказалі, што трэба атрымаць ад BYSOL выплату. Я перапісваўся з BYSOL, гэта цягнулася дзесьці да 20 жніўня. Але я ім казаў, што ў мяне няма ніякіх кантактаў у Польшчы, я не ведаю, дзе мне ўзяць рахунак. У выніку BYSOL мне нічога не пералічыў. На пэўны час яны заціхлі. Я ўжо падумаў, што ўсё. Але ў нейкі дзень яны зноў мне пішуць і кажуць: «Цяпер табе трэба напісаць у «Вясну» і спытаць, як табе выехаць». Калі я напісаў у «Вясну», мне там параілі напісаць запыт на гуманітарную польскую візу ў польскае кансульства ў Мінску. І кадэбісты мне напісалі, як мне гэты ліст скласці. І каб я напісаў, што мяне проста звольнілі, бо я быў у спісе «экстрэмістаў». І сказалі нікому не казаць, што мяне з працы вывез КДБ», — распавёў Вадзім.

Ён падаў зварот у польскае кансульства 2 верасня і праз некаторы час атрымаў візу.

«Пасля атрымання візы я купіў квіткі да Варшавы. <�…> Уначы 3 кастрычніка я заехаў у Польшчу. І я адразу планаваў пайсці ў польскую службу, якая займаецца бяспекай. Бо я, яшчэ калі быў у Беларусі, разумеў, што гэтым займацца не буду. Але ў той жа час я разумеў, што калі яны зразумеюць, што я нешта замышляю супраць іх, то я ўжо не змагу выехаць. <�…> Але мне насамрэч было вельмі страшна, я не ведаў і цяпер не ведаю, якія могуць быць наступствы. І ў выніку я вырашыў зрабіць публічную заяву і распавесці ўсё як ёсць, каб «абнуліць» усе гэтыя заданні і планы КДБ. Я вырашыў для гэтага звярнуцца ў «Вясну», бо кантакт з гэтай арганізацыяй быў са мной ад самага пачатку. Я хачу публічна заявіць пра тое, што са мной адбылося, і адмовіцца ад любога супрацоўніцтва з КДБ Беларусі», — заявіў Вадзім.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com