21 лiстапада 2026, Субота, 13:21
Падтрымайце
сайт
Сім сім,
Хартыя 97!
Рубрыкі

Мінздароўя змяніла правілы фізкультуры для школьнікаў і студэнтаў у Беларусі

Мінздароўя змяніла правілы фізкультуры для школьнікаў і студэнтаў у Беларусі

Наваўвядзенні звязаныя з падрыхтоўкай да прызыву ў войска.

Мінздароўя змяніла парадак, паводле якога навучэнцаў размеркоўваюць па медыцынскіх групах для ўрокаў фізкультуры. Цяпер юнакоў, прыдатных да ваеннай службы, нельга накіраваць у спецыяльную медыцынскую групу або групу лячэбнай фізкультуры (ЛФК). Правілы замацаваныя пастановай Мінздароўя № 99 ад 28 жніўня 2026 года, якую афіцыйна апублікавалі на Нацыянальным прававым партале pravo.by 20 лістапада. Ужо сёння, 21 лістапада, яна ўступіла ў сілу.

Новыя нормы распаўсюджваюцца амаль на ўсю сістэму адукацыі: дзіцячыя сады, школы, установы прафесійна-тэхнічнай адукацыі, каледжы і ўніверсітэты. Яны не датычацца толькі вайсковых навучальных устаноў.

Асноўнае змяненне датычыць юнакоў 17–18 гадоў і мужчын старэйшых за 18 гадоў. Цяпер, калі лекары прызнаюць іх здароўе такім, што адпавядае катэгорыям «прыдатны да ваеннай службы» або «прыдатны да ваеннай службы з нязначнымі абмежаваннямі», іх нельга аднесці да спецыяльнай медыцынскай групы або накіраваць у групу ЛФК.

Ацэнка прыдатнасці да службы будзе праводзіцца паводле тых жа патрабаванняў, што дзейнічаюць пры прыпісцы да прызыўных участкаў, прызыве на тэрміновую службу і службу ў рэзерве. Сама змена, як тлумачыць Мінздароўя, «накіравана на павышэнне фізічнай падрыхтаванасці будучых ваеннаслужачых», піша «Смартпрэс».

Пры гэтым новыя правілы не азначаюць, што ўсе 17-гадовыя аўтаматычна будуць займацца фізкультурай без абмежаванняў і здаваць любыя нарматывы. Рашэнне аб групе, як і раней, прымае лекар: ён глядзіць на стан здароўя, медыцынскія дакументы і вынікі абследаванняў. Супрацьпаказанні да пэўных нагрузак, калі яны ёсць, павінны ўлічвацца.

Да таго ж медыцынская група для ўрокаў фізкультуры не замяняе медыцынскі агляд пры прызыве — гэта розныя працэдуры.

У якія чатыры групы па фізкультуры наогул размеркоўваюць

Асноўная — для навучэнцаў «без адхіленняў у стане здароўя і фізічным развіцці, а таксама з адхіленнямі ў стане здароўя», якія не перашкаджаюць нармальнай працы арганізма. Яны займаюцца фізкультурай у поўным аб'ёме, здаюць нарматывы, могуць хадзіць у спартовыя секцыі і выступаць на спаборніцтвах.

Падрыхтоўчая — для тых, хто аднаўляецца пасля хваробы, а таксама для навучэнцаў з хранічнымі захворваннямі, якія знаходзяцца пад кантролем і выклікаюць толькі нязначныя парушэнні. Нагрузкі і нарматывы для іх дапускаюцца з улікам рэкамендацый лекара, а каб запісацца ў секцыю або ўдзельнічаць у спаборніцтвах, патрэбен дадатковы медагляд.

Спецыяльная медыцынская група — для навучэнцаў з хранічнымі хваробамі або наступствамі перанесеных захворванняў, з-за якіх арганізм працуе з лёгкімі парушэннямі. Яны займаюцца па спецыяльных праграмах Мінадукацыі, не здаюць нарматывы і не ўдзельнічаюць у спаборніцтвах.

Група ЛФК — для тых, у каго праблемы са здароўем выяўлены больш істотна. Іх вызваляюць ад звычайных урокаў фізкультуры і нарматываў. Замест гэтага з імі па індывідуальнай праграме займаюцца лячэбнымі практыкаваннямі спецыяльна падрыхтаваныя медыцынскія работнікі.

Магчымасць часова не займацца фізкультурай пасля хваробы захавалася. Вызваленне могуць даць пасля траўмы, аперацыі, вострай хваробы або абвастрэння хранічнай хваробы. Колькі яно будзе доўжыцца, вырашае лекар — пры неабходнасці ён таксама можа накіраваць навучэнца на дадатковае абследаванне.

Медыцынскую групу вызначаюць мінімум раз на год, звычайна перад пачаткам навучальнага года. Але калі здароўе навучэнца змянілася, то перавесціся ў іншую групу можна і ў сярэдзіне навучальнага года — пасля дадатковага медагляду.

Напісаць каментар

Таксама сачыце за акаўнтамі Charter97.org у сацыяльных сетках

▲