Самы багаты бізнесмен Расіі скарачае інвестыцыі і рыхтуецца звальняць супрацоўнікаў

Мардашоў увайшоў у «адмоўны кэш».

«Северсталь» спыніла набор персаналу і разглядае магчымасць звальненняў на фоне крызісу ў металургічнай галіне, паведаміў у інтэрв’ю РБК асноўны ўладальнік і старшыня савета дырэктараў кампаніі Аляксей Мардашоў.

«Мы спынілі прыём новых супрацоўнікаў на «Северсталі». Магчыма, пойдзе гаворка пра пэўную аптымізацыю персаналу», — сказаў ён. Мардашоў дадаў, што пакуль не гатовы гаварыць пра маштабы гэтых мер.

Паводле яго слоў, таксама месяц таму кампанія на 24% скараціла інвестыцыйную праграму 2026-га года і плануе яшчэ мацней урэзаць гэтыя выдаткі ў наступным годзе.

Мардашоў, які з’яўляецца самым багатым расійскім бізнесменам са станам $37 млрд, пажаліўся на рэзкае пагаршэнне фінансавых паказчыкаў «Северсталі». Так, рэнтабельнасць кампаніі па EBITDA з пачатку года складае каля 12%, тады як раней нормай было 30–40%. Адначасова «Северсталь» сутыкнулася з адмоўным грашовым патокам. «Наша даходнасць радыкальна ўпала. Мы ўжо ўвайшлі ў адмоўны кэш. Мы трацім на інвестыцыі больш, чым зарабляем», — прызнаў Мардашоў.

Ключавой прычынай гэтых праблем ён назваў падзенне попыту на металапрадукцыю. Паводле слоў бізнесмена, летась спажыванне сталі ў Расіі скарацілася на 14%, за першыя 4 месяцы 2026-га — яшчэ на 13%, а сумарна за тры гады — на 30%.

Пры гэтым Мардашоў паскардзіўся, што «Северсталь» не можа спыніць усе бягучыя інвестыцыйныя праекты, нягледзячы на крызіс у галіне. «Мы ўжо зайшлі даволі далёка, і ў выпадку замарозкі будзе страчана тое, што выдаткавана. Нават тэхнічна вельмі цяжка затармазіць, калі мы ўжо закантрактаваныя, усё ўжо ідзе. Прыйдзецца, напэўна, за гэта плаціць», — канстатаваў бізнесмен. Ён дадаў, што перспектывы металургіі застаюцца няпэўнымі: «Якое дно будзе і калі, я не ведаю».

З пункту гледжання Мардашова, у цэлым расійская эканоміка дэманструе прыкметы «пераахаладжэння». Сярод іх ён назваў запаволенне інвестыцый і пагаршэнне сітуацыі на рынку працы.

Паводле падлікаў Get Experts, летась 25% расійскіх кампаній скарацілі супрацоўнікаў з-за фінансавых цяжкасцяў. Металургічныя заводы былі вымушаныя звольніць каля 3 тысяч чалавек пасля абвалу попыту на сталь, а некалькі буйных прадпрыемстваў, уключаючы Магнітагорскі металургічны камбінат, сталі стратнымі.

Да 20% супрацоўнікаў звольніў Сбербанк, яшчэ 13 банкаў скарацілі да 40% персаналу. У 2026 годзе хвалю звальненняў запусціў «Яндэкс»; каля 2 тысяч работнікаў адправіў на вуліцу «КамАЗ», які летась атрымаў рэкордную страту ў 43 млрд рублёў.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com