Беларускі эксперт ацаніў грыбны сезон

Такога не было за апошнія 10 гадоў.

Лета падыходзіць да канца, і грыбны сезон-2026 ужо можна папярэдне ацаніць. Сваім меркаваннем са smartpress.by падзяліўся вядомы беларускі грыбнік і блогер Аляксандр Гарбацэвіч.

— Гэты грыбны сезон, калі і не самы горшы, дык дакладна адзін з горшых за апошнія гадоў дзесяць, — падкрэслівае Аляксандр.

— Прыблізна 5 гадоў таму было вельмі сухое лета, і першыя грыбы пайшлі ў пачатку жніўня, але сёлета высакародныя грыбы толкам так і не з’явіліся дагэтуль.

Я бываў у лесе амаль штодзень з пачатку чэрвеня. За ўвесь гэты час было літаральна некалькі «ўспышак», калі на невялікіх участках лесу можна было сабраць адзін-два кашыкі грыбоў, калі паспець знайсці іх першым.

Суразмоўца дадае: грыбны няўраджай пачаўся яшчэ вясной, калі ў лясах павінны былі вырасці смарджы — самыя папулярныя ў свеце грыбы.

— Паводле аналітыкі бабруйскай вопытнай грыбніцы Марыі Нікітко, якая вывучае рэакцыю смарджоў на надвор’е ўжо 18 гадоў, пасля марозных снежных зім гэтых грыбоў заўсёды вельмі шмат, — тлумачыць Аляксандр Гарбацэвіч.

— Сёлета ўмовы надвор’я былі менавіта такімі. Больш за тое, некалькі дзён удзень тэмпература падымалася да +15 градусаў, а ўначы апускалася да +5: такі тэмпературны рэжым падтрымліваюць кітайцы на сваіх смарджовых фермах. Зыходзячы з усяго гэтага, мы чакалі вялікі ўраджай смарджоў, але фактычна іх амаль не было. Гэта быў найгоршы сезон за 18 гадоў. Тлумачэння таму, што адбылося, няма ні ў экспертаў ціхага палявання, ні ў міколагаў.

Аляксандр перакананы: сёлетні сезон паказвае, што ў прыродзе ёсць нейкія зменныя, якія людзі пакуль не выявілі.

— Пра сітуацыю са смарджамі я пытаўся ў НАН Беларусі, і вучоныя выказалі здагадку, што для пошуку адказу трэба аналізаваць не зіму і вясну, а восень папярэдняга года, бо менавіта тады грыбы зараджаюцца, — кажа грыбнік.

Але наперадзе яшчэ ўся восень, магчыма, яна парадуе беларусаў багаццем дароў лесу.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com