Сікорскі заклікаў НАТА збіваць расійскія ракеты над Украінай

Гэта дапаможа абараніць і Польшчу, і ўкраінскія гарады.

Краінам НАТА неабходна збіваць расійскія дроны і ракеты ў паветранай прасторы Украіны, заявіў міністр замежных спраў Польшчы Радаслаў Сікорскі. «Калі ў наш бок ляціць крылатая ракета — а ўсяго месяц таму адна з іх выбухнула на тэрыторыі Польшчы, — значна лепш збіць яе ў мэтах самаабароны, пакуль яна яшчэ знаходзіцца ў паветранай прасторы Украіны, чым дапусціць сітуацыю, у якой яе зб'юць, а абломкі ўпадуць на каго-небудзь па гэты бок мяжы», — сказаў Сікорскі ў інтэрв’ю BBC Radio 4.

Паводле яго слоў, такі падыход дапаможа як Польшчы, так і Украіне. У прыватнасці, калі краіны НАТА абароняць паветраную прастору над Заходняй Украінай, то ў Львове зноў можа запрацаваць аэрапорт, адзначыў Сікорскі. Ён дадаў, што гэтае пытанне цяпер абмяркоўваецца не толькі ў самой Польшчы, але і ўнутры Паўночнаатлантычнага альянсу. Рэгулярныя абстрэлы Расіяй украінскіх гарадоў раней неаднаразова прыводзілі да таго, што ракеты і беспілотнікі заляталі на тэрыторыю Польшчы.

Раніцай 13 верасня расійскія ваенныя нанеслі ўдар па аўтазапраўцы і пасажырскім цягніку на станцыі «Ягодын» у Валынскай вобласці — недалёка ад польска-ўкраінскай мяжы. Дрон трапіў у лакаматыў цягніка, які ішоў з Кіева ў Варшаву. Ідзе гаворка пра чыгуначную лінію, па якой у сталіцу Украіны на працягу ўсёй вайны прыязджалі лідары замежных дзяржаў. Падчас расійскай атакі польскія вайскоўцы паднялі ў паветра знішчальнікі, а сілы бяспекі выпусцілі папярэджанні для жыхароў прыгранічных раёнаў.

На гэтым фоне прэм’ер-міністр Польшчы Дональд Туск тэрмінова сабраў міністраў, прадстаўнікоў войска і спецслужбаў. Ён заявіў, што эскалацыя з боку Расіі «становіцца рэальнасцю» і стварае рызыкі для Польшчы. «Найбліжэйшыя тыдні і месяцы стануць перыядам вельмі інтэнсіўнай актыўнасці з расійскага боку, і, на жаль, мы не можам выключаць, што гэтая эскалацыя закране і нашу тэрыторыю», — сказаў польскі прэм’ер. Туск падкрэсліў, што Польшча і яе саюзнікі па НАТА «павінны быць гатовыя да сумеснага адказу ў выпадку неабходнасці».

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com