«Мёртвая рука» Пуціна: Расія адрадзіла сістэму адказнага ядзернага ўдару

У Уральскіх гарах пашыраны сакрэтны падземны вайсковы комплекс пад назвай «Аб’ект 1335».

Расследаванне, праведзенае журналістамі выдання The Sunday Times, а таксама медыягрупамі Danwatch і Цэнтрам «Дасье», паказала, што ў Уральскіх гарах Расія пашырыла сакрэтны падземны вайсковы комплекс пад назвай «Аб’ект 1335». Звязаная з ім савецкая сістэма «Перыметр», вядомая на Захадзе як Dead Hand («Мёртвая рука»), зноў цалкам функцыянуе. Гэтая сістэма прызначаная для нанясення адказнага ядзернага ўдару.

Падчас расследавання журналісты прааналізавалі мільёны расійскіх дакументаў, якія, як мяркуецца, наўмысна былі ў адкрытым доступе, каб з імі маглі азнаёміцца заходнія выведслужбы. Справа ў тым, што гэтыя дакументы ўтрымліваюць звесткі пра тое, што адзін з самых сакрэтных ваенных аб’ектаў Расіі быў пашыраны і мадэрнізаваны. Менавіта адсюль можа быць аддадзены загад на нанясенне адказнага ядзернага ўдару па краінах Захаду.

Кытлым — гэта невялікі пасёлак на поўначы Свярдлоўскай вобласці, што знаходзіцца побач з гарой Косьвінскі Камень. Унутры гэтай гары яшчэ за часоў СССР быў абсталяваны сакрэтны ядзерны камандны пункт — «Аб’ект 1335».

Журналісты высветлілі, што ўнутры гары дзесяцігоддзямі ствараўся велізарны абаронены комплекс з падземнымі тунэлямі, сістэмамі сувязі і жыццёзабеспячэння, а таксама апаратурой кіравання стратэгічнымі ядзернымі сіламі. Новыя даныя сведчаць, што расійская праграма адказных ядзерных ракетных удараў цалкам гатовая да дзеяння.

У Савецкім Саюзе была распрацаваная стратэгія «Суднага дня» пад назвай «Перыметр», але на Захадзе яна вядомая як «Мёртвая рука». Гэтая стратэгія неразрыўна звязаная з «Аб’ектам 1335». «Перыметр» — гэта рэзервовая сістэма кіравання ядзернымі сіламі. Яе задача — забяспечыць адказны ядзерны ўдар нават пасля таго, як кіраўніцтва краіны і асноўныя камандныя пункты знішчаныя, а звычайныя лініі сувязі больш не працуюць.

Як паказвае расследаванне, пасля мадэрнізацыі сакрэтнага аб’екта расійскае кіраўніцтва атрымала магчымасць ажыццяўляць адказны ядзерны ўдар нават у аўтаматычным рэжыме. То-бок, рашэнне аб нанясенні ядзернага ўдару можа быць прынята без удзелу чалавека.

У выпадку ядзернага ракетнага ўдару па Расіі і страты сувязі з кіраўніцтвам краіны могуць быць задзейнічаныя рэзервовыя каналы кіравання, размешчаныя ў «Аб’екце 1335». Яны дазваляюць перадаваць радыёсігналы на мабільныя ракетныя ўстаноўкі, а таксама ракетам, размешчаным у шахтах. Усе гэтыя ракеты павінны быць адразу ж запушчаныя ў бок праціўніка.

Як паказвае расследаванне, сакрэтны ваенны аб’ект можа захоўваць працаздольнасць нават у выпадку нанясення па ім прамога ўдару ядзернымі ракетамі. Журналісты лічаць, што праект «Мёртвая рука» быў адроджаны на фоне падрыхтоўкі Пуціна да магчымай пагрозы нападзення з боку Захаду.

Том Росет, нарвежскі эксперт па пытаннях палітыкі бяспекі Расіі, лічыць, што РФ, верагодна, забяспечыла абарону гэтага аб’екта ад любых відаў зброі.

«Пашырэнне «Аб’екта 1335» адбываецца на фоне маштабнай мадэрнізацыі расійскіх ядзерных сіл, якой у Узброеных Сілах РФ надаецца першачарговая ўвага. У сённяшняй напружанай геапалітычнай абстаноўцы Расія ўспрымае сябе як бок, што знаходзіцца ў канфлікце з Захадам», — кажа эксперт.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com