КДБ хацеў завербаваць актывіста «Маладога Фронту»
3- 6.02.2009, 9:14
У чацьвер да актывіста гомельскага «Маладога Фронту» Дзяніса Сяськова ў каледж прыйшоў супрацоўнік Камітэта дзяржаўнай бяспекі.
Па словах юнака, супрацоўнік КДБ распытваў пра палітычную дзейнасьць маладафронтаўца, яго сувязь з Андрусём Цянютам.
«Больш за ўсё яго цікавіў Андрусь Цянюта: з кім кантактуе і працуе, ягоныя знаёмыя і сябры, чым ён займаецца ў вольны час і іншыя факты з жыцьця Андруся», – кажа Дзяніс Сяськоў.
Напрыканцы размовы супрацоўнік КДБ прапанаваў Дзянісу Сяськову прадстаўляць вядомую яму інфармацыю аб дзейнасьці МФу ў Камітэт дзяржбясьпекі. Безумоўна, маладафронтавец ад такой прапановы адмовіўся.
Нагадаем, што 3 лютага ў Гомелі падчас пікету ля будынка гомельскага ўпраўлення КДБ былі затрыманыя і дастаўленыя ў Цэнтральны РУУС Гомеля актывісты «Маладога Фронту» і аргкамітэта па стварэнні партыі БХД: Васіль Такарэнка, Кастусь Жукоўскі і Андрэй Цянюта. Маладафронтавец Андрэй Цянюта ўжо не ў першы раз выклікае зацікавленасць КДБ. У верасні 2007 года Цянюта быў прызнаны падазраваны ў дзейнасці ад імя незарэгістраванай у Беларусі арганізацыі «Малады фронт». Была заведзена крымінальная справа.
