З 27 тысячаў назіральнікаў – 90 з апазіцыі
4- 14.12.2010, 17:03
У выбарчых камісіях па выбарах прэзідэнта па стане на 13 снежня акрэдытавана 27 тыс. 282 унутраных назіральніка.
Пра гэта БелаПАН паведамілі ў Цэнтрвыбаркаме.
Пры Цэнтральнай камісіі акрэдытаваныя сем назіральнікаў, у тэрытарыяльных камісіях — 706, ва ўчастковых — 26 569.
Найбольшая колькасць назіральнікаў высунутая грамадскімі аб'яднаннямі — 17 005. Актыўней за ўсіх у гэтым плане Федэрацыя прафсаюзаў Беларусі — 3923 чалавекі, БРСМ — 3545 чалавек, РГА «Белая Русь» — 3480, Беларускае грамадскае аб'яднанне ветэранаў — 2984.
Грамадзяне шляхам падачы заяваў высунулі 4791 назіральніка, працоўныя калектывы — 3187.
Палітычныя партыі пакуль высунулі 2299 назіральнікаў. Найвялікшую колькасць назіральнікаў з партый высунула Камуністычная партыя Беларусі (795 чалавек) і Беларуская сацыяльна-спартовая партыя (471). Беларуская аграрная партыя высунула 353 назіральніка, Рэспубліканская партыя працы і справядлівасці — 322, Рэспубліканская партыя — 252, Беларуская патрыятычная партыя — 16.
З апазіцыйных партый Аб'яднаная грамадзянская партыя высунула 27 чалавек, Партыя БНФ — 22, Беларуская партыя левых «Справядлівы свет» — 17, Беларуская сацыял-дэмакратычная партыя (Грамада) і Беларуская сацыял-дэмакратычная Грамада — па 9, Кансерватыўна-хрысціянская партыя-БНФ — 6.
Вылучэнне і акрэдытацыя назіральнікаў працягваюцца.
