Лукашэнка: Замежныя назіральнікі адчулі сябе гаспадарамі на гэтых выбарах

Беларускі дыктатар не задаволены кантролем назіральнікаў за ходам выбараў.

«Але мы і самі вінаватыя. Разгарнуўшы гэтую дэмакратыю па ўсёй краіне, напэўна, гэтым самым далі нейкі няправільны сігнал усім, хто сёння займаецца выбарамі, гэта значыць рабіце што жадаеце, прыходзьце на ўчасткі, рабіце што заўгодна, каб толькі, крый божа, не падумалі замежнікі, перш за ўсё пра тое, што ў нас недэмакратычныя выбары, — адзначыў Лукашэнка, каментуючы інфармацыю, якая з'явілася, пра скаргі на назіральнікаў за выбарамі ад апазіцыі. — Напэўна, ужо занадта мы ў гэтым дачыненні спрабавалі спадабацца нашым замежным назіральнікам, вось яно і пайшло».

«Дзівяць і замежныя назіральнікі. Яны, бачыце, ледзь ці не гаспадарамі сябе адчулі на гэтых прэзідэнцкіх выбарах, хоць яны назіральнікі. Яны павінны назіраць за выбарамі і рабіць высновы. Гэта не іх справа — лічыць. Яны павінны характарызаваць сам выбарны працэс», — падкрэсліў Лукашэнка.

«Мы адкрыліся далей няма куды, вы ж бачыце, што адбываецца, — сказаў кіраўнік дзяржавы, звяртаючыся да журналістаў. — Але трэба разумець, што ўсё ж такі выбары праводзім мы, нашая краіна, у нас ёсць свой народ і мы не можам дазволіць камусьці прыйсці, падкасаўшы рукавы, арудаваць на нашых участках — ці тое дэлегаты з Германіі, Францыі, ПАСЕ, АБСЕ. Гэта нашае суверэннае права. Мы гаспадары на гэтай зямлі і мы будзем праводзіць падобныя мерапрыемствы».

Ён таксама дадаў: «Гэты Рубікон ужо не павінны перайсці назіральнікі: ні ўнутраныя, ні знешнія. Яны павінны разумець, што беларусы самі паводле сваіх законаў і Канстытуцыі будуць праводзіць гэтыя выбары. А баяцца нам няма чаго».