МТС выконвае загады выканкамаў?
29- 23.04.2010, 17:54
Гарадзенскія абаненты мабільнага аператара МТС 23 красавіка сталі атрымліваць смс-паведамленні з заклікам прагаласаваць датэрмінова.
У паведамленні гаворыцца, у якія дні і гадзіны можна датэрмінова прагаласаваць на выбарах дэпутатаў у мясцовыя саветы, паведамляе сайт кампаніі «Праваабаронцы за свабодныя выбары».
Спачатку ўзнікла пытанне: навошта камерцыйнай структуры ўмешвацца ў выбарчы працэс? Але неўзабаве высветлілася, што заказчыкам масавай СМС-рассылкі з'яўляецца Гарадзенскі аблвыканкам.
Як лічаць мясцовыя грамадскія праваабаронцы, такую рассылку па сутнасці можна расцэньваць як заклік да людзей галасаваць менавіта датэрмінова. Тым больш што ў СМС-паведамленьні нічога не сказана пра дзень асноўнага галасавання.
