«Перспектыва» патрабуе спыніць вайну з прадпрымальнікамі

Рэспубліканскае грамадскае аб'яднанне «Перспектыва» апублікавала маніфест «За прадпрымальніцкую Беларусь!».

У маніфесце «Перспектыва» заклікае ўладу, палітыкаў і грамадзянскую супольнасць «спыніць вайну з прадпрымальнікамі», пішуць «Беларускія навіны».

«Уся гісторыя беларускай дзяржаўнасці была гісторыяй барацьбы прадпрымальнікаў з чынавенскім бязмежжам і бюракратыяй, - гаворыцца ў маніфесце, апублікаваным на сайце «Перспектывы». - Прадпрымальнікі Беларусі хочуць працаваць на карысць краіны, для яе росквіту і павышэння дабрабыту грамадзян. Хопіць ставіць эксперыменты над бізнэсам. Мы хочам ісці за цывілізаваным светам у нагу з часам, а не жыць паводле законаў мінулага», - гаворыцца ў маніфесце.

«Перспектыва» прапануе Лукашэнку ўсталяваць наступныя асноўныя прынцыпы працы ўлады з прадпрымальніцкай супольнасцю:

- Усе пастановы ўлады датычныя бізнэсу павінны прымацца з улікам меркавання і са згоды прадпрымальнікаў;

- Усталяваць прыярытэтнасць прыватнага бізнэсу як больш эфектыўнай камерцыйнай дзейнасці, здольнай стаць асновай інтэнсіўнага развіцця нацыянальнай эканомікі;

- Перашкоду прадпрымальніцкай дзейнасці з боку чыноўнікаў расцэньваць як злачынства;

- Пераарыентаваць чыноўнікаў, якія вядуць кантрольна-наглядныя функцыі, з выканання планаў па штрафах прадпрымальнікаў на рэальную дапамогу бізнэсу ў захаванні мноства нормаў заканадаўства;

- Гарантаваць прадпрымальнікам недатыкальнасць іх маёмасці.

Заклік апублікаваны напярэдадні чарговага форуму прадпрымальнікаў, які пройдзе ў Менску 14 снежня. Яго тэма - «Будучыня прадпрымальнікаў з 1 студзень 2016 г.: наступствы, рызыкі і прапановы».

Згодна з указам Лукашэнкі №222 аб рэгуляванні прадпрымальніцкай дзейнасці з 1 студзеня 2016 ІП павінны будуць рэалізоўваць прадукцыю лёгкай прамысловасці, увезеную з краін Мытнага саюза, толькі з суправаджальнымі дакументамі.

Прадпрымальнікі неаднаразова заяўлялі, што не змогуць працаваць у новых умовах, бо іх пастаўшчыкі, пераважна з Расеі, альбо адмаўляюцца выдаваць дакументы на тавары, якія пацвярджаюць іх паходжанне, альбо выдаюць фіктыўныя дакументы.