Арыштаваны алігарх Юрый Чыж

Адзін з уплывовых бізнэсоўцаў краіны, які ўваходзіў у найбліжэйшы круг Лукашэнкі, затрыманы КДБ.

Гэтую інфармацыю паведамілі карыстальнікі партала і пацвердзілі некалькі інфармаваных крыніц, піша tut.by.

«У «Трайпла» былі класічныя «маскі-шоў». КДБ затрымала кіраўнікоў кампаніі», - напісалі карыстальнікі.

«Вы разумееце, што без санкцый Лукашэнкі нічога не адбылося. Але ён. (Юрый Чыж - Рэд.) ужо некалькі месяцаў быў у няміласці. Таму нельга сказаць, што затрымалі сябра каманды Лукашэнкі», - кажа суразмоўца. «Ягоны ўплыў, можа быць, саслабеў, але не настолькі, каб не змагацца за свой бізнэс, якому ўжо больш за 20 гадоў. Не апярэджвайце падзеі. Усё будзе нармальна», - парыруе чалавек з атачэння Чыжа.

Непрыемнасці сталі пераследваць Юрыя Чыжа неўзабаве пасля затрымання ягонага партнёра Уладзіміра Япрынцава. Паміж імі адбыўся канфлікт. І меркаванне дзелавых колаў падзялілася з нагоды ўдзелу ў гэтым асноўнага ўладальніка «Трайпла». Адны меркавалі, што Чыж павінен быў падставіць плячо свайму паплечніку, іншыя думалі, што правільна зрабіў, што здаў Япрынцава.

«На грошы трапіў сын Япрынцава, Валодзя, як бацька, хацеў выратаваць сітуацыю. Але ў выніку сам патрапіў за краты праз наводку Юры», - кажа крыніца. «А пры чым тут дружба? Як гаворыцца, нічога асабістага - толькі бізнэс. Япрынцавы напракудзілі - гэта іхнія справы», - апаніруе чалавек з атачэння Чыжа.

Крыніцы сцвярджаюць, што абодва карысталіся заступніцтвам на самым версе і пад гэтай маркай вялі бізнэс. «Асноўныя падазрэнні - ашуканскія схемы, вывады капіталу за мяжу. Пасівы і актывы ўжо даўно ў бізнэсоўца не скачуць», - кажа суразмоўца.

У «Трайпле» адмовіліся ад каментароў. Юрый Чыж не здымае трубку. У КДБ атрымаць каментар не атрымалася.

Адзначым, Юрыя Чыжа ўжо затрымлівалі ў 2007 годзе на трое сутак паводле справы тагачаснага кіраўніка «Белнафтахіма» Аляксандра Бароўскага. Яго адпусцілі пад падпіску аб нявыездзе. Праўда, сам алігарх адмаўляў арышт.

У 2001 годзе Чыж патрапіў у «чорны спіс» кампаній, супраць якіх Еўразвяз увёў эканамічныя санкцыі. У 2016 годзе санкцыі супраць бізнэсоўца знялі.

Нагадаем, набліжаная да Аляксандра Лукашэнкі кампанія «Трайпл» купляла прадукт у Расеі, дадавала ў яго біядабаўкі і адпраўляла за межы Мытнага Саюза, не плацячы расейскай пошліны, якая ў 2012 годзе складала 250 даляраў за тону. Згодна з украінскім экспэртам, гэтая схема ўзбагачэння беларускай кампаніі не была ні для каго сакрэтам. Яна падрабязна апісаная ва ўкраінскіх і беларускіх СМІ.

Паспяховы бізнэс, у якім, як кажуць, быў замешаны і Япрынцаў-малодшы, прыйшлося прыкрыць, калі расейцы ўслых выкрылі аналагічную схему з распушчальнікамі-растваральнікаў. Дзякуючы ёй, Беларусь толькі ў 2011 годзе ўзбагацілася на 2 млрд даляраў.

Падобна на тое, што Япрынцаў-малодшы калі не наўпрост карыстаўся рэпутацыяй «Трайпла» і свайго бацькі, то як мінімум не адхрышчваўся ад іх.

Раней крыніцы ў бізнэс-асяроддзі распавялі: «Украінскія справы - гэта ўвогуле кропля ў моры, можна сказаць ні пра што». Паводле іх звестак затрыманне саўладальніка «Трайпла» Уладзіміра Япрынцава і ягонага сына Казбека звязаная з вялікімі запазыкамі (называліся сумы ад 30 да 40 млн даляраў) «заможным людзям з Расеі».

У жніўні 2015 года быў затрыманы ўплывовы бізнэсовец, адзін з саўладальнікаў холдынгу «Трайпл» Уладзімір Япрынцаў. Арыштавалі яго ў Менску, адразу пасля вяртання з Масквы. Аднаго з самых уплывовых і багатых бізнэсоўцаў Беларусі бралі паводле ўсіх правіл сілавога «маскі-шоў» з удзелам спецназа. Характэрна, што за некалькі дзён да арышту ягоны сябар Юрый Чыж збіраў кавуны разам з прэзідэнтам Лукашэнкам. Юрый Чыж адмовіўся каментаваць арышт Япрынцава.