Скандал на МТЗ: на заводзе знайшлі нястачу

Работнікі адмаўляюцца плаціць і кажуць, што папярэджвалі начальства.

На адным са складоў цэха камплектацыі Менскага трактарнага завода выявілі нястачу амаль у 8 тысяч рублёў. Пры службовай праверцы высветлілася, што прычына знікнення дэталяў - «неналежнае выкананне» супрацоўнікамі склада рабочых інструкцый. Спагнаць нястачу наважылі за кошт матэрыяльна адказных асоб, якімі з'яўляюцца ўсе працаўнікі склада. Завадчане выплачваць са сваёй кішэні адмаўляюцца і кажуць, што не раз папярэджвалі начальства аб нястачы, паведамляе tut.by.

Служба бяспекі завода пры праверцы праз нястачу ў пачатку лістапада выявіла прапажу 272 рычагоў са шчоткай на агульную суму 7 917,92 рублёў. Нястача, згодна праверцы, утварылася з красавіка да кастрычніка гэтага года. Факт крадзяжу дэталяў устанавіць не ўдалося, бо камер відэаназірання на складзе няма. Пры праверцы апыталі некаторых работнікаў склада, аднак прычыну ўтварэння нястачы ніхто растлумачыць не можа.

- Калі пайшлі вялікія нястачы, мы звярталіся да начальніка цэха. Першы раз - дзесьці ў ліпені. Аднак ён на гэта ўвагі не звяртаў і ніякіх дзеянняў не рабіў, - распавядае працаўнік цэха камплектацыі МТЗ. - Потым выявіўся факт нястачы. Ніякі разгляд не праводзіўся - толькі праверка службы бяспекі завода, паводле вынікаў якой пастанавілі спагнаць нястачу з супрацоўнікаў склада.

Пра тое, як утварылася нястача, самі завадчане не ведаюць:

- Можа, чалавечы фактар, а можа, сапраўды скралі. Ні камер, ні сігналізацыі на складзе няма - устанавіць не ўдалося. Неабходна, каб міліцыя ў гэтай сітуацыі разбіралася. Цяпер «вісіць» яшчэ адна нястача на куды большую суму, пра якую многія ведаюць. І паўтараецца такая ж гісторыя: мы гаворым кіраўніцтву, аднак яны нічога не робяць. Неўзабаве запланаваная інвентарызацыя - тады нястача выявіцца і за яе, напэўна, ужо нашы ўнукі будуць плаціць.

Кіраўніцтва завода пацвярджае, што нястача была выяўлена начальнікам цэха камплектацыі і, магчыма, як раз на паведамленне работнікаў. Таксама кіраўніцтва кажа, што ў прычынах утварэння нястачы разбіраецца міліцыя.

- Служба бяспекі правяла праверку і ўстанавіла, што нястача сапраўды ёсць. Былі апытаныя працаўнікі, якія пацвердзілі, што ведаюць аб нястачы. Згодна з заканадаўствам, пры нястачы матэрыяльна адказныя асобы нясуць адказнасць. Начальнік цэха прапанаваў работнікам склада аплаціць шкоду. Супрацоўнікі адмовіліся, пагатоў унутры завода дакладна не ўстаноўлена, калі і што адбылося і хто вінаваты ва ўтварэнні нястачы. У сувязі з гэтым кіраўніцтвам завода была пададзеная заяву ў РУУС Партызанскага раёна. Даследчая праверка ўжо праводзіцца міліцыяй, - распавядае кіраўнік аднаго з падраздзяленняў завода.

Бо добраахвотна выплачваць нястачу работнікі склада адмовіліся, спагнаць неабходную суму з іх кіраўніцтва завода можа толькі праз суд, для падачы пазову ў які, як кажа кіраўнік падраздзялення, неабходныя вынікі праверкі міліцыі.

- Людзі выплачваць адмовіліся, таму, згодна з заканадаўствам, цяпер спагнаць грошы мы можам толькі праз суд. Гэта можна зрабіць пасля праверкі міліцыі, гэта будзе залежаць ад таго, да якіх высноў праваахоўныя органы прыйдуць. Не хочацца казаць, што гэта крадзеж, пакуль няма вынікаў. Нястача ўзнікае па розных прычынах, у тым ліку і праз чалавечую халатнасць. Усё павінна быць згодна з законам. Грошы спаганяць з іх ніхто не будзе, пакуль не завершаная праверка міліцыі, - растлумачыў суразмоўца.