Праз непагадзь самалёты «Белавіі» не здолелі сесці ў Менску
- 26.07.2017, 14:05
- 25,379
Ім давялося прызямляцца ў Гомелі.
Непагадзь, якая ўчора, 25 ліпеня, віравала ў Менску, адбілася і на дзейнасці авіякампаній. Самалёты «Белавіі», якія ляцелі ў сталіцу з Кіева і Калінінграда, вымушаныя былі прызямліцца ў Гомелі, піша tut.by.
У Гомелі пасажыры прабылі ў сярэднім паўгадзіны. Як распавялі ў Гомельскім аэрапорце, усё прайшло ў працоўным рэжыме, усе былі гатовыя, бо такое здараецца не першы раз.
Так, у лістападзе праз неспрыяльныя варункі надвор'я ў Гомелі прызямліліся адразу 7 самалётаў, якія ляцелі з Еўропы і Санкт-Пецярбурга ў Менск.
Нагадаем, увечары 25 ліпеня і ўночы 26 ліпеня ў Менску выпала рэкордная колькасць ападкаў. Такога дажджу ў беларускай сталіцы не было за ўсю гісторыю метэаралагічных назіранняў.