Тры гісторыі пра тое, як бацькі змагаліся з графікам «пад Міколку»

І пяць пытанняў да ініцыятараў пераносу пачатку заняткаў у школах.

Жарсці вакол пачатку школьных заняткаў не аціхаюць. Бацькі наракаюць на блытаніну: цяпер вучням даводзіцца хадзіць у школу да рознага часу: каб дзеці вярталіся дадому крыху раней, у навучальных установах ставяць факультатывы і класныя гадзіны перад урокамі. Прычым Мінадукацыі не бачыць у гэтым нічога дрэннага, хоць яшчэ зусім нядаўна ціснула на неабходнасць лішняй гадзіны сну для дзяцей, спасылалася на разнастайныя санітарна-гігіенічныя нормы.

Больш таго, у Мінадукацыі заяўляюць, што перанос заняткаў — гэта пастанова саміх школ, прынятая супольна з бацькамі. «Салідарнасць» знайшла бацькоў, якія паспрабавалі данесці сваю пазіцыю да школьнага кіраўніцтва, і высветліла, што з гэтага атрымалася.

Гісторыя першая. Пасіўная незадаволенасць

Школа №66, як і большасць сталічных школ, у гэтым навучальным годзе перанесла пачатак заняткаў на 9 раніцы. У мінулыя гады ўрокі тут пачыналіся а 8.30, і ўжо тады гэта выклікала незадаволенасць бацькоў.

— Наша школа раней была з музычным ухілам, і па сённяшні дзень многія дзеці акрамя звычайных урокаў наведваюць музычныя ў якасці факультатываў, — распавядае маці адной з вучаніц. — Дзіця прыходзіць дадому вельмі позна: пасля звычайных урокаў то музыка, то хор, тое сальфеджыа. Натуральна, нам было зручней, каб урокі пачыналіся а 8 раніцы, аб чым мы неаднаразова казалі класнай. У адказ яна толькі разводзіла рукамі: такі загад кіраўніцтва школы.

Зрэшты, ваяваць за нейкіх паўгадзіны бацькі ў той час не ўважалі за патрэбнае. Калі ж стала зразумела, што з гэтага навучальнага года заняткі могуць перанесці на больш позні час, яны сур'ёзна ўстурбаваліся.

— Уявіце, як старшакласнікам: у іх жа па 7-8 урокаў на дзень, плюс яшчэ 2-3 ўрокі музычных! Банальна часу зрабіць хатняе заданне не стае, не кажучы ўжо пра нейкія спартыўныя секцыі, — бядуе жанчына. — І так дадому пад вечар прыходзілі.

Да апошняга бацькі спадзяваліся, што здаровы сэнс пераможа і школа пакіне хоць бы ранейшы час 8.30. Але перад пачаткам навучальнага года іх чакала расчараванне.

— Ніякіх размоў з гэтай нагоды з бацькамі не было. Хлусня чыстай вады, што школы прымалі пастанову супольна з намі. Усё лета ў школе толькі паціскалі плячыма: маўляў, чаго раней часу каламуціць ваду, нічога пакуль невядома, трэба пачакаць. Ну вось, пачакалі. Цяпер маем тое, што маем, — уздыхае суразмоўца.

Падняць гэтае пытанне бацькі паспрабавалі ўжо постфактум на сходзе, які прайшоў на пачатку года.

— Мы сказалі класнай, што хочам напісаць хадайніцтва дырэктару аб пераносе заняткаў, на што тая стала ўгаворваць нас гэтага не рабіць. Казала, што мы гэтым усё адно нічога не даможамся. Маўляў, самі ведаеце, дзе прымалася пастанова, а вінаватай буду я, што не патлумачыла вам палітыку партыі, — распавядае суразмоўца.

Як і ў большасці іншых школ, у якіх «палітыка партыі» апынулася вышэйшай за інтарэсы дзяцей, раніцу, якую вызвалілі для сну, тут загрузілі класнымі і інфармацыйнымі гадзінамі.

Гісторыя другая. Актыўная пазіцыя

А вось у сталічнай гімназіі №18 бацькі не сталі чакаць навучальнага года і загадзя паклапаціліся аб часе пачатку ўрокаў.

— Мы напісалі хадайніцтва на імя кіраўніцтва школы з просьбай пачынаць заняткі а 8 раніцы. Матывавалі загружанасцю і неабходнасцю наведваць дадатковыя гурткі і секцыі, — распавядае мама адной з вучаніц.

Аднак і іх чакала расчараванне — гімназія з пачатку года перайшла на графік з 9 раніцы.

— На сходзе класная распавяла, што праз нашае хадайніцтва яна мела праблемы. Кіраўніцтва паставіла ёй у віну, што яна не правяла належнай растлумачальнай працы з бацькамі. У выніку і праблему не развязалі, і ні ў чым невінаватага чалавека падставілі, — бядуе жанчына.

Развязаць праблему позняга вяртання дзяцей і тут пастанавілі пераносам факультатываў і пазакласных гадзін на раніцу.

— Гэта нейкі жах. Бацькі, у якіх двое і больш дзяцей-школьнікаў, проста з глузду з’язджаюць. Аднаго ў адзін час прывесці, іншага — у іншы, і кожны дзень па-рознаму. Паспрабуй усё гэта ў галаве трымаць, ды яшчэ і пад працу падладзіцца! Гэта так яны ў міністэрстве жыццё дзецям і бацькам палегчылі? — задаецца пытаннем суразмоўца.

Гісторыя трэцяя. Пераможная

Але вядомая гісторыя і аб тым, як школа, пачаўшы працаваць з 9 раніцы, усё ж перакроіла свой графік. Праўда, для гэтага спатрэбілася ўмяшанне самога міністра адукацыі і залішняя прадпрымальнасць кіраўніцтва навучальнай установы. Гаворка ідзе аб школе ў Барысаве, дзе за гадзіну з ранку з бацькоў прыдумалі браць грошы.

Зрэшты, калі б гэтая гісторыя не трапіла ў СМІ, не факт, што сітуацыя шчасна развязалася б. Пасля грамадскага рэзанансу Міністэрства адукацыі заявіла, што школы такой камерцыяй займацца не павінны, а міністр і зусім здзівіўся, навошта ў згаданай установе перайшлі на 9 раніцы?

— Дык вось гэтая школа, з якой узніклі праблемы, працуе ў дзве змены. Дык навошта трэба было пераводзіць яе на 9 раніцы? Мы ж дамовіліся, што тыя, хто працуе ў дзве змены, могуць пачынаць заняткі а 8.30. Гэта проста недапрацоўка мясцовай адміністрацыі, таму мы гэтыя пытанні будзем кантраляваць і ўважліва адсочваць, — заявіў Ігар Карпенка.

Цяпер у згаданай школе ўрокі будуць пачынацца а 8.15. І тое зусім не таму, што бацькі пра гэта папрасілі.

Але, на жаль, на ўсе навучальныя ўстановы краіны ўвагі міністра не выстарчыць, аб чым ён сам неаднаразова казаў.

А між тым у бацькоў назапасіліся пытанні да Міністэрства, на якія яны хацелі б атрымаць адказы:

— Якім спосабам яшчэ можна дастукацца да кіраўніцтва школ, калі ўсе іх звароты ігнаруюцца?

— Чаму для дзяцей і школ, якія працуюць у адну змену, гадзіна сну неабходная паводле санітарна-гігіенічных нормаў, а для дзяцей з двума зменамі гэтыя нормы можна не ўлічваць?

— Ці не ўціскаюцца правы школьнікаў, якія з 8 раніцы вымушаныя чакаць пачатку урокаў, сыходзячы пры гэтым дадому ў той жа час, што і дзеці, якія прыйшлі да 9.00?

— Ці стане здароўе дзяцей мацнейшым, калі праз дадатковыя заняткі іх рэжым увесь час парушаецца і ўставаць школьнікам даводзіцца кожны дзень у розны час?

— І калі, нарэшце, скончацца тэхнічныя экспэрыменты ў сістэме адукацыі, а пачнецца праца для паляпшэння ўзроўню ведаў?