Міністэрства юстыцыі РФ прызнала Нямецкі фонд Маршала ЗША непажаданай арганізацыяй

Расейскае нагляднае ведамства ўнесла амерыканскі няўрадавы фонд у спіс непажаданых арганізацый.

Міністэрства юстыцыі Расеі ўключыла амерыканскую міжнародную няўрадавую арганізацыю «Нямецкі фонд Маршала Злучаных Штатаў» (англ. The German Marshall Fund of the United States) у спіс непажаданых на тэрыторыі краіны, паведамляе РБК.

Такія захады ў дачыненні да арганізацыі прыняты ў адпаведнасці з законам «Аб мерах ўздзеяння на асоб, якія маюць дачыненне да парушэнняў асноўных правоў і свабод чалавека, правоў і свабод грамадзян Расейскай Федэрацыі», гаворыцца ў паведамленні Міністэрства юстыцыі.

Нямецкі фонд Маршала Злучаных Штатаў, як вынікае з паведамлення на сайце самой арганізацыі, быў створаны ў 1972 годзе ў мэтах «умацавання трансатлантычнага супрацоўніцтва <...> у духу плана Маршала». Арганізацыя, акрамя гэтага, прапануе палітыкам-пачаткоўцам дапамогу ў развіцці сваіх навыкаў, а таксама падтрымлівае «грамадзянскую супольнасць на Балканах і ў чарнаморскім рэгіёне шляхам умацавання дэмакратычных ініцыятыў, вяршэнства закона і рэгіянальнага супрацоўніцтва». Штаб-кватэра арганізацыі знаходзіцца ў Вашынгтоне, аддзяленні працуюць у Бэрліне, Парыжы, Брусэлі, Бялградзе, Анкары, Бухарэсце і Варшаве, а таксама невялікія прадстаўніцтвы ў Браціславе, Турыне і Стакгольме. Згодна з планам мерапрыемстваў, 29 сакавіка ў Вашынгтоне арганізацыя плануе правесці канферэнцыю на тэму «Далейшая замежная палітыка Пуціна».

У 2017 годзе, пасля абвінавачванняў Расеі ва ўмяшанні ў амерыканскія выбары, арганізацыя стварыла «Альянс за захаванне дэмакратыі». Мэта праекта - «стрымліванне намаганняў дзяржаўных структур Расеі і іншых краін у падрыве дэмакратыі».

Нямецкі фонд Маршала стаў 14-й арганізацыяй у спісе непажаданых арганізацый расейскага Мінюста. Разам з амерыканскай НКА ў пераліку ўжо знаходзяцца Грамадскі сеткавы рух «Адкрытая Расея» (Вялікабрытанія), праект OR (Otkrytaya Rossia, «Адкрытая Расея», Вялікабрытанія), Інстытут сучаснай Расеі (ЗША) і іншыя.