У Чарнагорыі адбылася інаўгурацыя прэзідэнта Міла Джукановіча
- 20.05.2018, 21:39
- 7,955
Джукановіч набраў блізу 54 адсоткаў галасоў на прэзідэнцкіх выбарах 15 красавіка.
У Чарнагорыі ў нядзелю прайшла інаўгурацыя прэзідэнта Міла Джукановіча, абранага на другі тэрмін. Першы прэзідэнцкі мандат Джукановіч атрымаў у 1998 годзе і адпрацаваў на пасадзе кіраўніка дзяржавы да 2002 года. Ён неаднаразова займаў пасаду прэм'ер-міністра, паведамляе «Радыё Свабода».
Чарнагорыя стала адной з найбольш развітых у эканамічным сэнсе дзяржаваў на захадзе Балканскага паўвострава. Лідар рэформаў і актыўны ўдзельнік перамоваў з Еўрапейскім звязам, Чарнагорыя – першая ў чарзе наступных чальцоў звязу, заявіў Джукановіч 20 траўня на цырымоніі прымання прэзідэнцкай прысягі.
Джукановіч набраў блізу 54 адсоткаў галасоў на прэзідэнцкіх выбарах 15 красавіка.
Былы камуніст, Міла Джукановіч у 1991 годзе стаў самым маладым прэм'ер-міністрам Еўропы, тады яму было 29 гадоў. Джукановіч заставаўся блізкім хаўруснікам Слабадана Мілошавіча, прэзідэнта Югаславіі ў перыяд яе распаду, а потым прэзідэнта Сербіі. У 1998 годзе, аднак, Джукановіч узначаліў працэс паступовага аддалення Чарнагорыі ад Сербіі, што прывяло ў 2006 годзе да абвяшчэння незалежнасці Падгорыцы ад Белграда.
З тых часоў Джукановіч прасоўваў краіну з насельніцтвам 640 тысячаў чалавек праз эканамічныя цяжкасці да інтэграцыі з ЕЗ. Значнай падзеяй у гэтым прасоўванні стала ўступленне Чарнагорыі ў NATO ў 2017 годзе.
Апазіцыя крытыкуе цяперашняга прэзідэнта за падтрымку палітычнага фаварытызму і патаканне карупцыі.