Brexit: у Лондане дзясяткі тысяч людзей заклікаюць да новага рэферэндуму
- 23.06.2018, 21:26
- 10,261
Паводле папярэдніх ацэнак, у дэманстрацыі бяруць удзел 50 тысяч чалавек.
У суботу, у другую гадавіну рэферэндуму, на якім брытанцы прагаласавалі за выхад сваёй краіны з ЕЗ, тысячы людзей выйшлі на пратэст у Лондане з патрабаваннем правесці новае ўсенароднае апытанне.
Як паведамляе BBC, людзі патрабуюць новага рэферэндуму наконт дамове з ЕЗ аб Brexit.
Арганізатары дэманстрацыі - кампанія "Голас народа" (People's Vote) - адзначаюць, што "пагадненне яшчэ не дасягнутае" і "голас народа павінен быць пачуты". Ініцыятыва з'явілася, паколькі старэйшыя міністры ўрада, Ліам Фокс і Дэвід Дэйвіс, сцвярджаюць, што Вялікабрытанія гатовая выйсці з перамоў з ЕЗ наогул без усякай угоды аб будучых стасунках.
Некаторыя з арганізатараў пераконваюць, што ў брытанцаў павінен быць выбар - пакінуць ЕЗ з пагадненнем, пра якое дамаўляецца ўрад, або застацца ў складзе Еўразвязу.
"Але самае важнае, што гэта не толькі пастанова 650 палітыкаў у Вестмінстары... Brexit - гэта велізарная справа, якую павінны разглядаць усе 65 млн людзей у краіне, менавіта таму людзі сёння мітынгуюць за народнае галасаванне", - заявіў Джэймс МакГроры з арганізацыі Open Britain.
Паводле папярэдніх ацэнак, у дэманстрацыі бяруць удзел 50 тысяч чалавек, паведамляе The Guardian.
Вялікабрытанія павінна пакінуць ЕЗ 29 сакавіка 2019 года. Пагадненне з ЕЗ аб Brexit павінен таксама ўвосень ухваліць брытанскі парламент. Аднак цяпер не зразумела, што здарыцца, калі парламент прагаласуе супраць яго.