На выездзе з Беларусі стаяць чэргі з аўто
- 3.07.2018, 14:56
- 11,259
Для таго, каб трапіць сёння на тэрыторыю Польшчы, давядзецца выдаткаваць амаль 7-8 гадзін.
Паводле ацэнак заўсёднікаў чэргаў на беларуска-польскай мяжы, каб патрапіць у гэты дзень на тэрыторыю Польшчы, давядзецца выдаткаваць дзесьці 7-8 гадзін. Як распавялі «Брестской газете» берасцейцы, чые аўтамабілі стаялі перад шлагбаўмам выезду з тэрыторыі КУП «Памежны сэрвіс» у пункт пропуску «Брэст», яны сталі ў чаргу блізу 6 раніцы. Паводле іх разлікаў, каб прайсці ўсе памежныя фармальнасці, спатрэбіцца яшчэ як мінімум 3 гадзіны.
Са слоў суразмоўцаў, звычайна яны перасякаюць мяжу гадзіны за 4. «У выхадныя заўсёды шмат аўто, але ў гэты аўторак усе значна больш павольна працуюць. Аўтамабілі прапускаюць дзесьці раз на гадзіну», - падзяліліся яны.
Пра тое, што ў пунктах пропуску на беларуска-польскім кірунку ўтварыліся чэргі на выезд з Беларусі, Дзяржпамежкамітэт Беларусі паведаміў яшчэ ўвечары 2 ліпеня.
«Акрамя павелічэння пасажыраплыні, адной з прычын працяглага чакання пры перасячэнні мяжы стала ўзмацненне праверачных мерапрыемстваў супрацоўнікамі кантрольных службаў Польшчы ў дачыненні да асобаў, якія ідуць з Беларусі», - патлумачыла прычыну памежная ўстанова.
Пры гэтым адзначаецца, што афармленне легкавога аўтамабіля ў беларускім пункце пропуску займае да 10 хвілін.
«У сувязі з нерытмічным запускам транспартных сродкаў на тэрыторыю польскіх памежных пераходаў супрацоўнікамі кантрольных службаў сумежнай дзяржавы грамадзянам даводзіцца чакаць у чарзе паміж пунктамі пропуску дзяржаў пасля праходжання ўсіх тыпаў кантролю пасля афармлення на беларускім баку», - тлумачыць Дзяржпамежкамітэт.
Таксама невялікая чарга блізу 11 раніцы 3 ліпеня назіралася на беларуска-польскай мяжы ў пункце пропуску «Дамачава» - амаль 30 аўтамабіляў чакалі на выездзе з Беларусі.
З існым станам колькасці транспарту перад пунктам пропуску можна азнаёміцца ў спецыялізаваным раздзеле інфармацыйнага партала Дзяржпамежкамітэта «Чэргі на мяжы». З інфармацыяй аб звестках штодзённай сярэдняй велічыні чэргаў - у раздзеле «Графікі чэргаў».
