Расейскай эканоміцы прыходзіць канец

Паводле ацэнкі экспэртаў, расейская эканоміка ва ўмовах санкцый не зможа нармальна развівацца.

Расейскія чыноўнікі і палітыкі, журналісты і палітолагі правялі дзень 22 жніўня, анансаваны як дата ўваходжання ў дзеянне новых санкцый ЗША ў сувязі са «справай Скрыпаля», каментуючы наступствы, да якіх можа прывесці забарона на пастаўку прадукцыі падвойнага прызначэння, экспарт вырабаў і тэхналогій, звязаных са сферай нацыянальнай бяспекі ЗША, а таксама паставак электронікі, кампанентаў і тэхналогій з нафтагазавай галіны, піша «Голос Америки».

Рубель напярэдадні дрэнных навін з-за акіяна ўпаў як у дачыненні да даляра, так і еўра, нягледзячы на рост коштаў нафты.

Раней прэс-сакратарка Дзяржаўнага дэпартамента Хізэр Ноерт заявіла: «ЗША прыйшлі да высновы, што ўрад Расеі выкарыстаў хімічную і біялагічную зброю насуперак міжнароднаму праву і расейскаму заканадаўству. Гэта цягне за сабой увядзенне абавязковых санкцый. Згодна з законам ЗША аб знішчэнні зброі масавай паразы, калі крытэрыі не будуць выкананыя на працягу 90 дзён, мы павінны будзем разгледзець другі раўнда санкцый».

На думку кіраўніка Мінпрамгандлю РФ Дзяніса Мантурава, забарона на экспарт у Расею электронных прылад і камплектуючых падвойнага прызначэння, «безумоўна, закране некаторыя высокатэхналагічныя галіны, у тым ліку АПК (абаронна-прамысловага комплексу), але не крытычна» (цытата паводле «Интерфакс») .

Эканаміст, фінансавы і біржавы аналітык Сцяпан Дэмура мяркуе, што галоўнае значэнне санкцый ЗША, якія ўвайшлі ў дзеянне - папярэдзіць Маскву, што праз тры месяцы будзе ўведзены новы пакет абмежавальных захадаў. І тады, як яму ўяўляецца, «мала нікому не падасца».

«Крамлю падаюць гранічна ясны сігнал: усе настолькі сур'ёзна, што ўжо пара думаць галавой, - сказаў ён. - Усяго праз квартал аўтаматычна ўвойдзе ў дзеянне новы пакет абмежавальных мер, калі ў Маскве не адумаюцца. А я больш, чым упэўнены, што там працягнуць ранейшыя гульні, адмаўляючы відавочнае і робячы здзіўлены выгляд. Але гэтыя хітрыкі ўжо даўно не спрацоўваюць».

Калі праект адпаведнага закона будзе падпісаны прэзідэнтам ЗША, у выпадку, калі Расея адмовіцца супрацоўнічаць з міжнароднымі экспэртамі па хімічнай зброі, ёй у лістападзе пагражае другая хваля санкцый, яшчэ больш істотных. Між іншым, новы пакет мер прадугледжвае паніжэнне ўзроўню двухбаковых дыпламатычных стасункаў або нават іх поўнае прыпыненне, фактычна поўнае гандлёвае эмбарга і гэтак далей.

Разам з тым эканаміст згодны, што санкцыі ў іх сукупнасці сапраўды прымусілі Маскву трохі прыцішыць свой запал на міжнароднай арэне.

«Але тут я салідарны і са спадарыняй Мэркель у тым, што крамлёўскае кіраўніцтве неадэкватнае і жыве ў адрыве ад рэальнасці, - удакладніў ён. - У выніку адбываецца наступнае: на Захадзе рацыянальныя людзі, якія ведаюць, як працуе эканоміка, і ў якіх ёсць зваротная сувязь з грамадствам у сілу таго, што ў краіне існуюць рэальныя выбары, спрабуюць нешта растлумачыць і пра нешта дамовіцца з людзьмі , якія даўно адарваліся ад зямлі».

Са слоў, Сцяпана Дэмуры, у гэтым і заключаецца галоўная небяспека для насельніцтва Расеі, бо краінай кіруюць людзі, не здольныя ацаніць рэальныя пагрозы, якія нясуць санкцыі, роўна як і наступствы, якія тыя будуць мець.

«Ні пра якое развіццё краіны ў такіх умовах казаць не выпадае. Адбываецца дэградацыя прамысловага і навуковага патэнцыялу. Застаюцца газавая і нафтавая трубы ды чыгунка, па якой возяць сыравіну. Больш нічога не засталося, нават з таго, што было прадметам агульнага гонару пры Савецкім Саюзе. Тыповая сыравінная калонія», - рэзюмаваў эканаміст.

У сваю чаргу, дацэнт эканамічнага факультэта МДУ, у мінулым памочнік міністра фінансаў РФ Алег Буклемішаў назваў апошнія санкцыйныя захады яшчэ адной папераджальнай «галачкай» у доўгім спісе. Паводле яго ацэнкі, уступленне ў дзеянне чарговай порцыі антырасейскіх санкцый ад амерыканскага казначэйства або іншых знешніх сіл стала ўжо ледзь не каляндарным фактам.

«Напэўна, самае дрэннае тут не канкрэтны змест санкцый, якія сапраўды могуць быць у кожным асобным разе не асабліва значнымі, але іх комплекснае ўздзеянне на расейскую эканоміку - разважае ён. - Гэта таксама дае негатыўны эфект у псіхалагічным плане. Таму што кожная новая порцыя санкцый не толькі нясе матэрыяльныя наступствы, але яшчэ і пагаршае агульны маральны клімат».

Эканоміка - гэта шмат у чым чаканне, канстатаваў Алег Буклемішаў: «А тое, што людзі чакаюць ад эканамічнай дзейнасці заўтра, уплывае на іх учынкі сёння. Гэта азначае, што сёння краіна атрымае менш інвестыцый, насельніцтва абмяжуе сябе ў спажыванні. Увогуле, само эканамічнае развіццё, яго перспектывы пачынаюць згортвацца».

У лепшым выпадку краіну чакае «вельмі доўгая і глейкая стагнацыя», прагназаваў эканаміст. У той жа час ён выказаў асцярогу, што ў нейкі момант стагнацыя можа абярнуцца крызісам.