Малы бізнэс РФ заявіў пра самы складаны за 3 гады крызіс у эканоміцы

ІП чакаюць далейшай дэградацыі сітуацыі ў расейскай эканоміцы.

Малы бізнэс сутыкнуўся з рэзкім пагаршэннем эканамічных умоў, падзеннем спажывецкага попыту і чакае далейшай дэградацыі сітуацыі ў расейскай эканоміцы.

Як піша finanz.ru, такія звесткі прыводзіць «Альфа-банк» у чарговым даследаванні «Пульс малога бізнэсу».

Апытанне, праведзенае банкам сярод 3 тысяч індывідуальных прадпрымальнікаў і кампаній з выручкай да 350 мільёнаў расейскіх рублёў у год, паказаў, што ацэнкі і чаканні абваліліся да ўзроўняў «піка» эканамічнага крызісу.

Індэкс настрояў склаў мінус 27 пунктаў - горш за апошнія 3 гады прадпрымальнікі былі настроеныя толькі ў лістападзе 2015 года.

83% апытаных заявілі, што бягучы стан эканомікі не дае развіваць бізнэс. 50% уважаюць, што ў найбліжэйшыя паўгода сітуацыя працягне пагаршацца.

Бізнэс скардзіцца на дэградацыю ва ўсіх сферах: больш за палову рэспандэнтаў адзначылі падзенне прыбытку, траціна - зніжэнне колькасці кліентаў і пакупак.

73% канстатавалі сцісканне плацежаздольнага попыту ўнутры краіны; 59% уважаюць, што ён працягне скарачацца, пакідаючы бізнэс сам-насам з ціскам ад высокіх падаткаў (46% рэспандэнтаў) і недахопам фінансавых сродкаў (37%).

Доля тых, хто называе праблемай №1 падатковую нагрузку, расце з 2017 года - адбіваецца трэнд на «абяленні эканомікі» і ўзмацненне падатковага кантролю, адзначае Альфа-банк.

Паводле вынікаў мінулага года толькі за кошт мер па паляпшэнню збіральнасці бюджэт забраў у бізнэсу дадаткова 500 млрд рублёў. У план на наступны год закладзена яшчэ 500 млрд.

Падатковая нагрузка расце, прыбытак скарачаецца, а настроі кампаній пагаршаюцца, і яны вымушаныя шукаць новую бізнэс-мадэль, кажа кіраўніца кірунку маркетынгу масавага бізнэсу Альфа-банка Вольга Траццякова.

«Частка галін ужо некалькі гадоў знаходзіцца ў стагнацыі - гэта грузаперавозкі, будаўніцтва. Частка сегментаў нядаўна адчула зніжэнне даходаў і пачала ацэньваць свой «запас трываласці», - дадае яна.

Паспяховым свой бізнэс уважаюць 22% прадпрымальнікаў - гэтая доля нязменная і ўключае галоўным чынам кампаніі, якія працуюць больш за 5 гадоў, са штатам больш за 15 чалавек і арыентаваныя на экспарт.

У параўнанні з лістападам 2017 года колькасць прадпрымальнікаў, гатовых працягваць дзейнасць для дасягнення поспеху, скарацілася - з 41% да 34%. Пры гэтым 15% заявілі, што гатовыя цалкам зачыніць або прадаць бізнэс у агляднай перспектыве (1-5 гадоў).