«Героі не паміраюць!»: Як адбываўся марш памяці Жызнеўскага ў Кіеве

Падчас маршу актывісты неслі шасціметровы сцяг, у якім былі аб'яднаныя бел-чырвона-белы і жоўта-блакітны сцягі.

Шэсце, у якім удзельнічалі больш за 200 актывістаў, пачалося ад Міхайлаўскай плошчы і прайшло тым самым маршрутам, што і пяць гадоў таму, калі ў гэты ж дзень у апошні шлях праводзілі грамадзяніна Беларусі Міхала Жызнеўскага, які стаў адной з першых ахвяраў масавых акцый пратэсту 2013 – 2014 гадоў, паведамляе «Радыё Свабода».

Ушанаваць памяць Героя Украіны прыйшлі сябры беларускага Руху салідарнасці «Разам», беларускага цэнтра «Сябры», гарадскіх арганізацый Народнага руху Украіны, Правага сектара і УНА-УНСО, у якія ўваходзіў і Міхал Жызнеўскі.

Пад сцягамі сваіх арганізацый яны прайшлі шэсцем ад Міхайлаўскай да Сафійскай плошчы, па вуліцы Крэшчаціка да вуліцы Грушэўскага, дзе на месцы меркаванага забойства Міхала Жызнеўскага ўсталяваны памятны знак.

«Сёння дзень народзінаў Міхала Жызнеўскага – героя, які аб'яднаў нашы народы. Героі жывуць, пакуль іх памятаюць. Нацыі жывуць, пакуль памятаюць герояў», – сказаў беларускі актывіст Алег Аўчыннікаў перад пачаткам маршу.

Удзельнікі мітынгу дзяліліся ўспамінамі пра Майдан, і іншых герояў Нябеснай сотні, якія загінулі ў выніку супрацьстаяння.

«Сапраўды, фігура Міхала Жызнеўскага аб'ядноўвае нашы народы, і сённяшняя акцыя яшчэ раз гэта пацвярджае. Ва Украіне яго памятаюць, але памятаюць яго і ў Беларусі. У святле пагрозаў з усходу менавіта фігура Жызнеўскі паказвае, што не так безнадзейна ўсё і ў Беларусі, таму што менавіта Беларусь нарадзіла Героя Украіны», – сказаў адзін з лідараў руху салідарнасці "Разам" Вячаслаў Сіўчык.

Падчас маршу актывісты неслі шасціметровы сцяг, у якім былі аб'яднаныя бел-чырвона-белы і жоўта-блакітны сцягі.

Акцыя была санкцыянаваная гарадскімі ўладамі. Калону суправаджала машына паліцыі для забеспячэння руху, калі трэба было пераходзіць дарогу, спынялі іншыя аўто. Цягам шэсця ўдзельнікі скандавалі «Слава Украіне!» і «Жыве Беларусь!», «Героі не паміраюць».

На вуліцы Грушэўскага каля памятнага знака Жызнеўскаму ягоную памяць ушанавалі хвілінай маўчання. На гэтым акцыя закончылася.