Як выглядае эканоміка Беларусі на фоне Літвы і Польшчы
12- 19.10.2019, 19:20
- 27,952
Разрыў паміж Беларуссю і суседнімі краінамі ЕЗ расце неверагоднымі тэмпамі.
Дзве падзеі гэтага тыдня: Нацыянальны статыстычны камітэт апублікаваў звесткі пра рост ВУП за першыя 9 месяцаў года, а цэнтр эканамічных даследаванняў BEROC пры ўдзеле Нацыянальнага Банка правёў першы з серыі дыскусійных семінараў «Рэформы на 100 мільярдаў: эканамічны рост», піша «Салідарнасць».
Унутраны валавы прадукт павялічыўся на 1%. Здавалася б, што ў гэтым дрэннага? Усё ж такі рост, а не падзенне...
Нядобра становіцца, калі супаставіць гэтую лічбу са сказаным на семінары. Старшы навуковы супрацоўнік BEROC Дзмітрый Крук прывёў разлікі, якія датычацца ўзроўню рэальнага дабрабыту ў Беларусі і шэрагу краін Цэнтральнай і Усходняй Еўропы. У прыведзенай экспертам табліцы паказана, праз колькі гадоў наша краіна можа дагнаць па гэтым паказчыку найбліжэйшых «канкурэнтаў».
Дык вось, нават пры 2%-ным павышэнні ВУП Беларусі спатрэбіцца 246 гадоў, каб зраўняцца па ўзроўні жыцця з Польшчай. А Літву, маючы такія тэмпы росту, мы не дагонім наогул ніколі.
Вядома, прагнозы і матэматычныя мадэлі далёка не заўсёды супадаюць з рэальнасцю. Аднак дынаміка відавочная ў «канкурэнтаў»: разрыў паміж Беларуссю і суседнімі краінамі ЕЗ расце. «Моцная і квітнеючая» чамусьці адстае ўсё больш.