У Берасці п'яны кіроўца сам прыехаў да гаішнікаў
15- 19.10.2019, 21:14
- 19,968
Кіроўца з трыма праміле алкаголю ўрэзаўся ў аўтамабіль ДАІ.
У Берасці здарылася ДТЗ з удзелам Peugeot і службовага Volkswagen ДАІ. Пра гэта паведаміла прэс-сакратарка МУС Вольга Чамаданава ў тэлеграм-канале.
Інцыдэнт адбыўся 19 кастрычніка а 15.40 на вуліцы Маскоўскай. Берасцеец 1975 года нараджэння не справіўся з кіраваннем і сутыкнуўся з патрульнай машынай, якая стаяла на першай паласе руху.
У гэты момант супрацоўнік ДАІ афармляў іншае адміністрацыйнае правапарушэнне. У салоне Volkswagen знаходзілася два чалавекі - інспектар і правапарушальніца, на аўтамабілі быў уключаны пробліскавы маячок сіняга колеру.
Супрацоўнік ДАІ і дзяўчына атрымалі траўмы і былі дастаўленыя ў бальніцу. Пры правядзенні медыцынскага агляду ў вінаватага аварыі было зафіксавана звыш 3 праміле алкаголю.