CМІ вызначылі асобу аднаго з загінулых у Лівіі наймітаў «ПВК Вагнера»

Мінабароны РФ хавае інфармацыю пра загінулага.

Адным з загінулых нядаўна ў Лівіі расейцаў апынуўся, паводле звестак znak.com, екацерынбургскі журналіст, былы прэс-сакратар службы выратавання "Сава" 55-гадовы Яўген (Жаксыбай) Ілюбаеў. Ён удзельнічаў у грамадзянскай вайне на тэрыторыі Сірыі і Лівіі як супрацоўнік ПВК (як мяркуецца, гэта "ПВК Вагнера", кантраляваная Яўгенам Прыгожыным). Яго пахавалі на мінулым тыдні на ягонай радзіме ў пасёлку Новаорск Арэнбургскай вобласці.

Пра смерць Ілюбаева ў Лівіі на ўмовах ананімнасці апавёў суразмоўца з акружэння былога журналіста. "Апошнія некалькі гадоў ён неаднаразова выязджаў у зоны ўзброеных канфліктаў. Быў у Сірыі. Наколькі ведаю, ездзіў у складзе ПВК. Каля года таму за ўдзел у спецаперацыях атрымаў медаль За адвагу. Казалі нават, што ўзнагароды ім уручаў асабіста Уладзімір Пуцін. Паездка ў Афрыку стала ягонай апошняй камандзіроўкай. Калі пайшлі паведамленні, што нашы загінулі ў Лівіі, чамусьці адразу з'явіліся дрэнныя думкі. Сталі высвятляць, ці няма яго сярод загінулых. Так і здарылася. Дзесьці два тыдні таму сваякам патэлефанавалі, сказалі прыязджаць на апазнанне", – апавяла крыніца. Таксама крыніца паведаміла, што Ілюбаева пахавалі ў Новаорску (Арэнбургская вобласць), дзе ён нарадзіўся, "у родавай пахавальні".

Смерць Ілюбаева падчас баёў у Лівіі пацвердзіў таксама суразмоўца з ліку ветэранаў баявых дзеянняў у Данбасе, які прадаўжае падтрымліваць зносіны з тымі, хто выязджае з Урала ў зоны лакальных канфліктаў.

Афіцыйнага пацверджання гібелі Ілюбаева ў Лівіі няма.

Ілюбаев – ветэран вайны ў Афганістане. У 1992 годзе скончыў журфак Уральскага дзяржуніверсітэта, з 1996 да 2012 года працаваў прэс-сакратаром службы выратавання "Сава", узначальваў інфармацыйнае агенцтва ТАА "Тэлевізійная Служба выратавання". У 2015 годзе Ілюбаеў размяшчаў аб'явы пра тое, што шукае працу, на спецыялізаваных сайтах. "Актыўная грамадзянская пазіцыя, патрыёт. Статус: выратавальнік РФ. Валодаю навыкамі аварыйна-выратавальнай працы, першай медыцынскай і псіхалагічнай дапамогі", – гаварылася ў рэзюмэ.

На Ілюбаева ў Верхняй Пышме зарэгістраваная кампанія ТАА "ТБ Спас". Паводле звестак СПАРК, ён з'яўляецца сузаснавальнікам і ўладальнікам 40%. Адно з апошніх месцаў прапіскі, якое паказваў Ілюбаеў, знаходзіцца ў пасёлку Кедравае побач з Верхняй Пышмай, дзе Znak.com ужо знаходзіў байцоў ПВК, якія ўдзельнічалі ў баявых дзеяннях на тэрыторыі Сірыйскай Арабскай Рэспублікі.

Пра гібель байцоў "ПВК Вагнера" ў Лівіі стала вядома ў пачатку кастрычніка. Усяго загінула ад 10 да 35. Першыя паведамленні пра гібель расейцаў у Лівіі з'явіліся 9 верасня ў арабамоўным мікраблогу, потым аналагічныя звесткі з'явіліся на канале "Аль-Джазіра", у матэрыяле агенцтва Bloomberg. Паведамлялася таксама, што ад 10 да 35 чалавек сталі ахвярамі авіяўдару, які самалёты Урада нацыянальнай згоды нанеслі па пазіцыях Лівійскай нацыянальнай арміі фельдмаршала Халіфы Хафтара.

Як пісала "Медуза", 15 загінулых былі родам з Свярдлоўскай вобласці, з іх як мінімум двое – екацерынбуржцы. Гэта Арцём Неўянцаў (пазыўны Халк) і Ігнат Борычаў. Борычаў, напрыклад, ваяваў у Данбасе. Ягоны брат, Раман Борычаў, паводле некаторых звестак, загінуў пры замаху на былога міністра абароны "ЛНР" Аляксандра Бяднова.