Самалёты «Белавія» прыбываюць у Менск са спазненнем

З чым гэта звязана?

Чытачы Onliner паскардзіліся на непунктуальнасць сённяшніх рэйсаў авіякампаніі «Белавія»: немалая іх частка прыбывае ў Менск са значным спазненнем. У Нацыянальным аэрапорце прычыну адхілення самалётаў ад раскладу назваць не змаглі.

- У «Белавіі» сёння ў трэндзе затрымліваць рэйсы на 4-4,5 гадзіны. На працягу дня ўжо некалькі рэйсаў затрымалі, - адзначыла наша чытачка.

На гэты момант паводле інфармацыі, размешчанай на афіцыйным сайце Нацыянальнага аэрапорта Менск, спазняюцца рэйсы з маскоўскага «Дамадзедава» (амаль на паўтары гадзіны), Рыма (на 43 хвіліны), Варшавы (на 40 хвілін), Парыжа (на 2 гадзіны) і Стамбула (на 4 гадзіны 20 хвілін).

Журналісты патэлефанавалі ў даведачную службу Нацыянальнага аэрапорта Менск, каб высветліць, з чым звязаныя затрымкі ў раскладзе. Там праясніць сітуацыю не змаглі, парэкамендаваўшы звярнуцца ў авіякампанію.

У авіякампаніі «Белавія» пацвердзілі, што некаторыя рэйсы прызямляюцца ў Менску з адхіленнем ад раскладу, прычым пачалося ўсё яшчэ раніцай, з самалёта з Батумі. Звязаныя затрымкі з умовамі надвор'я.