«Усё добра, цудоўная маркіза?»

Як менскае «Дынама» павіншавала Лукашэнку з Новым годам.

30 снежня менскае «Дынама» правяло заключны ў 2019 годзе матч чэмпіянату Кантынентальнай хакейнай лігі. І ўстанавіла антырэкорд, пацярпеўшы 12-ю паразу запар.

Да гэтага ў пасіве менчукоў былі серыі з 11 прайграных матчаў. Але тузін правалаў выбудаваўся ў адзін ланцужок упершыню, піша «Салідарнасць».

Сімвалічна, што антырэкорд быў усталяваны ў гульні з горшай на той момант камандай КХЛ - рыжскім «Дынама». Прайграўшы яму на «Менск-Арэне» з лікам 0:2, «зубры» заадно і памяняліся з гасцямі месцамі, апусціўшыся на апошні радок зводнай табліцы лігі.

Вельмі характэрным апынуўся эпізод матча, калі форвард гаспадароў Франсіс Парэ не змог закінуць шайбу нават, калі «рамка» спаборнікаў засталася без брамніка.

У 42 матчах менчукі пацярпелі 33 паразы. Шанцы на плэй-оф практычна страчаныя яшчэ да Новага года.

Аднак галоўны трэнер «Дынама» Крэйг Вудкрафт у адстаўку не збіраецца. Пасля паразы ад рыжан трэнеру задалі пытанне: «Ці няма ў вас адчування, што вы ўжо не можаце дапамагчы камандзе?»

- Не, мяне не наведваюць такія думкі, - адказаў Вудкрафт. - Няма сумненняў, што гэта сапраўды цяжкі час для каманды, але вы ніколі не ўбачыце, як я ці трэнерскі штаб складуць рукі. Адзіны спосаб пераадолець цяжкасці - гэта працаваць над сабой і сваёй гульнёй. Трэба знаходзіць найменшыя пазітыўныя моманты, каб адштурхоўвацца ад іх.

Дзіўна і адсутнасць рэакцыі з боку кіраўніцтва клуба. Любога беларускага трэнера за такія вынікі даўно пагналі б паганай мятлой, а канадзец нібы валодае статусам недатыкальнага. У апошні час маўчыць нават Аляксандр Лукашэнка, які рэгулярна каментуе хакейныя «дасягненні»: у асноўным, пры дапамозе эпітэтаў «ганебшчына» і «стыдобішча».

Увогуле, «Дынама» пара мяняць гімн на гэтую песеньку...