Экс-дырэктар Магілёўскага мясакамбіната асуджаны за хабар у $2 тысячы
12- 1.03.2019, 21:27
- 17,775
Да пяці гадоў калоніі з канфіскацыяй маёмасці прысуджаны дырэктар Магілёўскага мясакамбіната.
Былую службовую асобу прызналі вінаватай у атрыманні хабару, паведамляе прэс-служба Гомельскага абласнога суда.
Як адзначалася ў матэрыялах справы, дырэктар мясакамбіната паабяцаў сузаснавальніку кампаніі «КормЖывСервіс» дапамагчы з пералічэннем грошай ад сельгаспрадпрыемства-даўжніка за матэрыяльную ўзнагароду сумаю 5% ад пералічаных сум, паведамляе tut.by.
Усяго, паводле звестак следства, у якасці ўзнагароды дырэктар атрымаў 2 тысячы 100 даляраў.
Суд палічыў віну службоўца даведзенай і прысудзіў яму да 5 год пазбаўлення волі ў калоніі ўзмоцненага рэжыму з канфіскацыяй маёмасці.
Ён таксама пазбаўлены права займаць пасады, звязаныя з ажыццяўленнем арганізацыйна-распарадчых, адміністрацыйна-гаспадарчых функцый і правядзеннем юрыдычна значных дзеянняў, на тэрмін 5 гадоў.
Прысуд у законнае дзеянне не ўвайшоў, можа быць абскарджаны і апратэставаны ва ўстаноўленым заканадаўствам парадку.
Скандальная слава
Магілёўскі мясакамбінат стаў скандальна вядомым у 2015 годзе, калі сілавікі пачалі раскрываць адну за адной карупцыйныя справы, у якіх былі замяшаныя яго кіраўнікі. За хабар тэрмін атрымала намесніца дырэктара прадпрыемства. Парушэнні выявілі ў фірмовай краме мясакамбіната, у супрацьзаконных дзеяннях былі абвінавачаныя некаторыя супрацоўнікі прадпрыемства.
Дырэктар прадпрыемства Міхаіл Хортаў, які ўзначальваў мясакамбінат без малога 21 год, быў адпраўлены на пенсію.
У 2016 годзе мясакамбінат узначаліў Уладзімір Латыгоўскі. Новы кіраўнік павінен быў навесці парадак на прадпрыемстве, аднак неўзабаве сам патрапіў у поле зроку праваахоўных органаў.
У кастрычніку 2018 года была распачатая справа супраць яшчэ аднаго экс-работніка прадпрыемства - кіраўніка Гарэцкага райпо Алега Бяляцкага. Паводле версіі следства, з чэрвеня 2016 года да траўня 2017-га Бяляцкі, працуючы на розных кіруючых пасадах у ААТ «Магілёўскі мясакамбінат», злоўжываў службовымі паўнамоцтвамі, чым нанёс прадпрыемству шкоду ў асабліва буйнай суме. Дэталі справы не раскрываюцца.