Віталь Кутузаў можа ачоліць Беларускую федэрацыю футбола

Таксама ў футбольных колах у кантэксце выбараў кіраўніка БФФ называецца кандыдатура Людаса Румбуціса.

Былы форвард нацыянальнай каманды Беларусі Віталь Кутузаў можа быць вылучаны на пасаду старшыні БФФ.

Чарговая справаздачна-выбарчая канферэнцыі федэрацыі пройдзе 27 сакавіка. Падчас мерапрыемства будзе абраны новы кіраўнік БФФ. Дзейны кіраўнік, прэм'ер-міністр Беларусі Сяргей Румас, раней адзначаў, што не збіраецца вылучаць сваю кандыдатуру. У адпаведнасці са статутам, тэрмін падачы дакументаў на вылучэнне мінае за 20 дзён да канферэнцыі, то ёсць 7 сакавіка.

Праўда, у статуце федэрацыі футбола маецца пункт, згодна з якім займаць пасаду старшыні мае права чалавек, які пастаянна пражывае на тэрыторыі Беларусі. Кутузаў жа даўно прыкіпеў да Італіі, дзе правёў большую частку футбольнай кар'еры. Зрэшты, паводле звестак pressball.by, у яго дагэтуль беларускі пашпарт і беларуская прапіска.

Таксама ў футбольных колах у кантэксце выбараў кіраўніка БФФ называецца кандыдатура Людаса Румбуціса. Аднак у размове з карэспандэнтам pressball.by Людас Іёнавіч гэтую інфармацыю зняпраўдзіў.