«Баста»: Кіраўнік дагуляецца да таго, што яго праклянуць

А пакуль беларусы будуць маліцца за збавенне краіны ад лукавага.

Беларускія ўлады прадоўжылі знішчэнне крыжоў у Курапатах, піша тэлеграм-канал «Баста».

Тадэвуш Кандрусевіч, кіраўнік Каталіцкага касцёла ў Беларусі:

«Яшчэ раз звяртаюся да адказных за знішчэнне крыжоў з заклікам: спыніце «крыжалом», каб шляхам дыялогу з грамадствам і рэлігійнымі арганізацыямі развязаць набалелую праблему і будаваць у нашай Айчыне цывілізацыю міру і згоды... Божа, абарані Крыж ад прыніжэння, бо ў ім - выратаванне».

Сяргей Лепін, прэс-сакратар Беларускай праваслаўнай царквы:

«Я думаў, што ўжо ўсё, але не... Добраўпарадкаванне Курапатаў прадаўжаецца. Знеслі яшчэ 60 крыжоў - на гэты раз металічных - якія былі ўсталяваныя ў 2017 годзе на грошы, сабраныя грамадскай дырэкцыяй Народнага мемарыялу «Курапаты» праз краўдфандынг.

Я не ўпаўнаважаны рабіць нейкія абагульненні і вызначаць за ўсіх, але, тым не менш, калі сярод удзельнікаў гэтага навядзення парадкаў ёсць праваслаўныя, то ім, як мне здаецца, варта параіцца са сваімі духоўнікамі на прадмет, трэба ці не каяцца ў такой вось праяве «чысталюбства».

Дыктатар дагуляецца да таго, што яго праклянуць. А пакуль беларусы будуць маліцца за збавенне краіны ад лукавага.

Нагадаем, што 4 красавіка ўлады знеслі крыжы па перыметры Курапатаў.

Актывісты паведамляюць, што было знесена і вывезена блізу 100 крыжоў.

1 сакавіка на прэс-канферэнцыі Лукашэнка выказаў незадаволенасць крыжамі вакол Курапатаў, якія бачныя з дарогі.

На заклік аднаго з лідараў Беларускага Нацыянальнага Кангрэсу Міколы Статкевіча ў цэнтры Менска адбыўся малебен, у якім удзельнічалі блізу 1000 чалавек.

Заклік падтрымаў сустаршыня БХД Павел Севярынец.

12 красавіка ўлады зноў знеслі 50 крыжоў па перыметры Курапатаў.

Партыя «Народная Грамада», якая ўваходзіць у Беларускі Нацыянальны Кангрэс, заклікала да новага малебна «Вызвалі нас ад лукавага» 15 красавіка а 18-й каля адміністрацыі Лукашэнкі (Менск, вуліца Карла Маркса, 38).