Пампея: ЗША гатовыя на перамовы з Іранам пры адной умове

Амерыканскія намаганні з мэтай рэзкага спынення зламысных дзеянняў Ірана працягнуцца.

Майк Пампея, дзяржаўны сакратар Злучаных Штатаў, заявіў у нядзелю, 2 чэрвеня, пра тое, што амерыканскія ўлады гатовыя «сесці за стол» перамоў з прадстаўнікамі Ірана, прычым «без папярэдніх умоў». Тым не менш, дзяржсакратар тут жа агучыў адну з іх.

«Мы гатовыя (...) уступіць у перамовы без папярэдніх умоў, мы гатовыя сесці» за стол (з іранскімі ўладамі), - заявіў Пампея, словы якога прыводзіць агенцтва Reuters, паведамляе RFI. Заява была зробленая на сумеснай прэс-канферэнцыі з міністрам замежных спраў Швейцарыі ў швейцарскім горадзе Белінцона.

Пры гэтым Пампея фактычна назваў як мінімум адну ўмову для пачатку перамоў паміж Вашынгтонам і Тэгеранам. «Мы, безумоўна, гатовыя правесці гэты дыялог, калі іранцы змогуць давесці, што хочуць паводзіць сябе як нармальная нацыя», - сказаў кіраўнік дыпламатычнага ведамства Злучаных Штатаў. І дадаў, што «амерыканскія намаганні з мэтай рэзкага спынення зламысных дзеянняў ісламскай рэспублікі (Іран)» «працягнуцца», паведамляе AFP.

Агенцтва адзначае, што «гэткая ясная» заява прадстаўніка амерыканскіх уладаў аб гатоўнасці да перамоў з Іранам - першае з траўня 2018 года, калі прэзідэнт Дональд Трамп прыняў пастанову аб выхадзе ЗША з так званай «Іранскай ядзернай угоды». Угода (афіцыйная назва якой - Сумесны ўсёабдымны план дзеянняў, СВПД) была заключаная летам 2015 г. паміж Тэгеранам і шасцёркай краін-пасярэднікаў (Расея, ЗША, Вялікабрытанія, Кітай, Францыя, Нямеччына).