Выканаўца ролі Джокера выйшаў на пратэст у Вашынгтоне
- 11.01.2020, 21:59
- 12,285
Хаакін Фэнікс удзельнічаў у кліматычным пратэсце.
Акцёр Хаакін Фэнікс, які выканаў галоўную ролю ў фільме "Джокер", арыштаваны паліцыяй за ўдзел у дэманстрацыі ў Вашынгтоне, паведамляе Variety. Агулам паліцыяй арыштаваныя 147 чалавек, сярод іх - зорка фільма Фрэнсіса Форда Копалы "Апакаліпсіс сёння" Марцін Шын, перадае "Радыё Свабода" са спасылкай на CNN.
Акцыя пратэсту ў падтрымку барацьбы з глабальным пацяпленнем прайшла ўночы суботы паводле менскага часу ў цэнтры Вашынгтона. Яна арганізаваная ў рамках штотыднёвых выступаў супраць глабальнага пацяплення двухразовай ўладальніцай "Оскара" Джэйн Фондай і праходзіла 14 тыдняў запар.
joaquin phoenix talked about how the meat & dairy industry contribute to climate change and that we can make changes to our daily routine to make a difference.
— kaz. (@joaquinsjoker) January 10, 2020
jane fonda said “i didn’t invite him, he came of his own volition”. pic.twitter.com/ooJwGcBxOS
Паліцыя выставіла арыштаваным абвінавачванні ў парушэнні грамадскага парадку. З кастрычніка паліцыя арыштоўвала і іншых удзельнікаў пратэстаў, у тым ліку саму Фонду, Сэма Уотэрстана, Тэда Дэнсана, Кэтрын Кінэр ды іншых галівудскіх актораў.
Драма "Джокер" Тода Філіпса перамагла летась на Вэнэцыянскім кінафэсце, Фэнікс атрымаў за выкананне ролі "Залаты глобус" і разглядаецца крытыкамі як галоўны прэтэндэнт на "Оскар" за найлепшую мужчынскую ролю ў гэтым годзе. У стужцы галоўнага героя арыштоўвае паліцыя, але яго вызваляюць пратэстоўцы.