ЗША і Кітай падпісалі гандлёвае пагадненне

Трамп назваў пагадненне «гістарычным».

У сераду, 15 студзеня прэзідэнт ЗША Дональд Трамп і віцэ-прэм'ер Дзяржаўнай рады КНР Лю Хэ падчас цырымоніі ў Белым доме падпісалі частковае гандлёвае пагадненне.

Трансляцыя вядзецца на канале Белага дома ў YouTube.

Падчас цырымоніі Трамп назваў пагадненне «гістарычным». Ён уважае яго «важным крокам» у бок справядлівага гандлю з Кітаем, паведамляе «Новое время».

«Я хачу падзякаваць Сі Цзіньпіну за яго супрацоўніцтва і партнёрства на працягу ўсяго гэтага вельмі складанага працэсу. Нашы перамовы былі складанымі, сумленнымі і паважлівымі. Яны прывялі нас да гэтага сапраўды неймавернага прарыву, які многія ўважалі немагчымым», - сказаў кіраўнік Белага дома, дадаўшы, што неўзабаве мае намер наведаць Кітай.

Трамп чарговым разам заявіў, што несправядлівая гандлёвая палітыка Кітая шкодзіла амерыканскім кампаніям на працягу дзесяцігоддзяў. На яго думку, пагадненне прынясе «велізарныя выгады для абедзвюх краін».

«Кітай узяў на сябе істотныя абавязанні ў адносінах да абароны амерыканскіх ідэй, камерцыйнай таямніцы, патэнтаў і гандлёвых марак... Кітай таксама будзе рашуча змагацца з распаўсюджваннем пірацкіх і кантрафактных тавараў, што з'яўляецца вялікай праблемай для многіх людзей у зале», - адзначыў ён.

Са слоў Трампа, кітайскія ўлады таксама пагадзіліся не патрабаваць ад кампаній перадаваць тэхналогіі для атрымання ліцэнзіі на вядзенне бізнэсу ў краіне.

Кіраўнік Белага дома дадаў, што Кітай у 2020-2021 гадах павялічыць імпарт з ЗША на $200 млрд, у тым ліку сельскагаспадарчай прадукцыі - на суму $50 млрд, прамысловых тавараў - $75 млрд, энэрганосьбітаў - $50 млрд, паслуг (у тым ліку фінансавыя) - $40- 50 млрд.

Трамп падкрэсліў, што пагадненне прадугледжвае сур'ёзныя абмежаванні для дэвальвацыі валюты.

Віцэ-прэм'ер Дзяржаўнай рады КНР Лю Хэ ў ходзе цырымоніі зачытаў ліст ад Сі Цзіньпіна. Кіраўнік Кітая адзначыў, што заключэнне папярэдняга гандлёвага пагаднення выгадна ЗША, Кітаю і міру ў цэлым. Сі Цзіньпін дадаў, што далей абодва бакі павінны па сапраўднаму сур'ёзна заняцца імплементацыяй пагаднення».

Дамоўленасць аб заключэнні «першай фазы» гандлёвай угоды была дасягнутая ў сярэдзіне снежня. Ёй папярэднічала 18-месячнае супрацьстаянне паміж двума найбуйнейшымі эканомікамі свету.

Трамп і Лю Хэ падпісалі 86-старонкавы дакумент падчас цырымоніі, на якую запрасілі больш за 200 гасцей, у тым ліку чыноўнікаў, дыпламатаў і прадстаўнікоў дзелавых колаў. Дамова пакуль не апублікаваная. Чакаецца, што яе апублікуюць сёння.

У рамках дамоўленасці ЗША скасавалі запланаванае на 15 снежня ўвядзенне 15%-ных мыт на шэраг тавараў з Кітая на суму $160 млрд. Гаворка ідзе ў тым ліку пра мабільныя тэлефоны, цацкі і ноўтбукі кітайскай вытворчасці. Акрамя таго, 15%-ные мыты на тавары кітайскага імпарту коштам $120 млрд, уключаючы плоскапанэльныя тэлевізары, бяздротавыя навушнікі і абутак, будуць зніжаны да 7,5%. Пекін у адказ паабяцаў у 2020-2021 гадах павялічыць на $200 млрд імпарт з ЗША сельскагаспадарчай прадукцыі, прамысловых тавараў, энэрганосьбітаў і паслуг. Гэта дапаможа скараціць дэфіцыт гандлёвага балансу ЗША з КНР, які дасягнуў піку ў $420 мільярдаў у 2018 годзе.

Bloomberg адзначае, што далейшае зніжэнне мыт на тавары кітайскага імпарту коштам $360 млрд будзе залежаць ад таго, ці выконвае Пекін умовы гандлёвага пагаднення. Са слоў крыніц выдання, мыты будуць зніжаны не раней чым праз 10 месяцаў пасля сённяшняй цырымоніі, гэта значыць ужо пасля прэзідэнцкіх выбараў у ЗША. 25%-ныя мыты на якія выкарыстоўваюцца амерыканскімі кампаніямі кітайскія прамысловыя тавары і кампаненты коштам $250 млрд застаюцца ў дзеянні.

Дата пачатку перамоў адносна «другой фазы» гандлёвага пагаднення пакуль не прызначаная. Кітайская газета Global Times напісала ў сераду са спасылкай на крыніцу, што перамовы з нагоды «другой фазы» гандлёвай угоды могуць не пачацца найбліжэйшым часам.