Пасажыраў, якія ляцяць у Беларусь з краін, дзе назіраецца ўспышка каронавіруса, правяраюць цеплавізарамі

Пра хваробу інфармуюць і беларускіх турыстаў, якія выязджаюць у гэтыя краіны.

У Беларусі ўзмоцненыя прафілактычныя мерапрыемствы, каб не дапусціць распаўсюджванне выяўленага ў Кітаі каронавіруса. Як распавялі ў Міністэрстве аховы здароўя, пасажыраў, якія ляцяць з краін, дзе выяўлены вірус, правяраюць у тым ліку з прымяненнем цеплавізійнага абсталявання, паведамляе tut.by.

- Міністэрства аховы здароўя Беларусі адсочвае сітуацыю з каронавірусам новага тыпу ў свеце, узмоцненыя прафілактычныя мерапрыемствы па недапушчэнні яго распаўсюджвання ў краіне. Праца спецыялістаў накіраваная на прафілактыку захворвання сярод тых, хто заязджае ў Беларусь з краін з неспрыяльнай эпідэмічнай сітуацыяй, - распавялі ў міністэрстве.

У аэрапортах Беларусі арганізаваны санітарна-каранцінны кантроль - пасажыраў з краін, у якіх зафіксаваныя выпадкі захворвання, правяраюць цеплавізарам.

Пра хваробу інфармуюць і беларускіх турыстаў, якія выязджаюць у гэтыя краіны.

Што вядома пра новы вірус

Вірус 2019-nCoV - варыянт каронавіруса, які дагэтуль не перадаваўся людзям.

Каронавірусы - сямейства вірусаў, якое ўключае 38 тыпаў вірусаў, толькі шэсць (а з новым вірусам - сем) з якіх зараджаюць чалавека.

Даследнікі лічаць, што, хутчэй за ўсё, вірус распаўсюдзіўся на людзей ад жывёл, але здольны таксама перадавацца ад чалавека да чалавека.

Сярод сімптомаў заражэння: падвышаная тэмпература, кашаль, абцяжаранае дыханне.

Людзям раяць не дакранацца да жывёл, пазбягаць недаваранага або недасмажанага мяса і яек, а таксама пазбягаць кантакту з людзьмі з сімптомамі прастуды ці грыпу.

Раней невядомы вірус стаў распаўсюджвацца ў кітайскім горадзе Ухань у пачатку снежня. Паводле інфармацыі кітайскіх медыкаў, вірус перадаецца ад чалавека да чалавека і выклікае ў заражаных пнеўманію.

Пазней выпадкі захворвання зафіксавалі за межамі Кітая: два ў Тайландзе, адзін у Японіі і адзін у Рэспубліцы Карэя. Паводле апошніх звестак, ад каронавіруса памерлі ўжо 6 чалавек.

22 студзеня Сусветная арганізацыя аховы здароўя правядзе экстраннае пасяджэнне.