«Героі не паміраюць»: у Кіеве прайшоў марш памяці Міхаіла Жызнеўскага
6- 26.01.2020, 20:23
- 17,087
Сёння - дзень нараджэння беларускага Героя Украіны.
З невялікага веча на Міхайлаўскай плошчы ў цэнтры Кіева пачалася акцыя ўшанавання памяці Героя Украіны, беларуса Міхаіла Жызнеўскага, які стаў адной з першых ахвяр падчас масавых акцый пратэсту ва Украіне ў 2013-2014 гадах, паведамляе «Радыё Свабода».
Арганізатарамі маршу памяці выступілі некалькі беларускіх і ўкраінскіх грамадскіх арганізацый - рух салідарнасці «Разам», Правы сектар, валанцёрскі рух «АУН», Міжнародны дабрачынны фонд «Валошка», УНСО, Міжнародны рух украінскіх суполак, Украінская нацыянальная рада ды іншыя.
Удзельнікі акцыі дзяліліся ўспамінамі пра Еўрамайдан ды іншых герояў Нябеснай сотні, якія загінулі ў выніку супрацьстаяння.
Упершыню на марш памяці Міхаіла Жызнеўскага прыйшоў вязень Крамля, адзін з лідараў УНА-УНСО Мікалай Карпюк, які неўзабаве пасля гібелі беларуса быў арыштаваны ў Расеі «за ўдзел у першай чачэнскай вайне». Асуджаны расейскім судом да 22,5 гадоў турмы, Мікалай Карпюк быў вызвалены летась у верасні ў рамках абмену зняволеных паміж Расеяй і Украінай.
«Міхаіл быў жыццярадасным чалавекам, заўсёды выпраменьваў энэргію дабра і радасці, нягледзячы на тое, што жыццё яго было складанае, яму давялося выехаць з Беларусі. Ён ніколі не звяртаў увагі на дробязі. Гэты чалавек быў мэтанакіраваны, апантаны ідэямі», - сказаў Мікалай Карпюк, успамінаючы Міхаіла Жызнеўскага.
У акцыі, санкцыянаванай гарадскімі ўладамі Кіева, удзельнічалі больш за 200 грамадзян. Пад сцягамі сваіх арганізацый яны прайшлі шэсцем тым жа маршрутам, як ў 2014 годзе ўдзельнікі акцый пратэсту праводзілі ў апошні шлях Міхаіла Жызнеўскага: ад Міхайлаўскага сабора, праз Сафійскі і Тэатральную плошчы, вуліцамі Хмяльніцкага, праз Хрэшчацік, майдан Незалежнасці да вуліцы Грушэўскага, дзе цяпер устаноўлены два памятныя знакі ў ягоную памяць.
На працягу маршу ўдзельнікі выконвалі ўкраінскі гімн і патрыятычныя песні, крычалі «Слава Украіне!» і «Жыве Беларусь!».
На вуліцы Грушэўскага ўдзельнікі акцыі ўшанавалі памяць Міхаіла Жызьневскага хвілінай маўчання.
Міхаіл Жызнеўскі браў удзел у акцыі пратэсту ў Кіеве з першых дзён - ён уваходзіў у самаабарону, якая ахоўвала Еўрамайдан. Беларус пасмяротна ўдастоены дзвюма вышэйшымі дзяржаўнымі ўзнагародамі Украіны - годнасцю і ордэнамі Героя Нябеснай сотні і Героя Украіны.
Адпаведныя ўказы падпісаў тагачасны прэзідэнт Украіны Пятро Парашэнка. І сёння ён згадаў пра Міхаіла Жызнеўскага ў адмысловым паведамленні на сваёй старонцы ў Facebook:
«Міхаіл Жызнеўскі нарадзіўся ў Беларусі, але ў 2013 годзе бясстрашна стаў плячом да пляча з украінцамі, каб абараняць ідэалы Свабоды і годнасці на Майдане. 22 студзеня 2014 года яго жыццё абарвала снайперская куля. Сёння яму споўнілася б 32 гады... Героі не паміраюць!».