«Людзі і агенцтвы ў падвешаным стане»

Што трэба ведаць пра атрыманне шэнгену за 80 еўраў з 2 лютага.

Доўгія гады мы чакалі зніжэння кошту на візы. І вось, 8 студзеня краіна падпісала пагадненне пра спрашчэнне візавага рэжыму з Еўразвязам. Візы будуць каштаваць 35 еўраў! Але зноў «але»: каб пагадненне пачало дзеянне, «парламент» Беларусі павінен зацвердзіць пагадненне, піша kp.by.

«Дэпутаты» збяруцца на сесію толькі 2 красавіка. Пачаць дзеянне дакумент можа праз два месяцы – значыць, як мінімум, з чэрвеня... Так што пакуль давядзецца плаціць за візу 80 еўраў паводле новага Візавага кодэкса, які пачне дзеянне з 2 лютага.

Журналісты праверылі, ці ёсць ажыятаж вакол атрымання візаў. Бо яшчэ пару тыдняў таму даводзілася праходзіць сапраўдны квэст:

– Датэлефанавацца ў візавы цэнтр Польшчы ў дзень выдачы датаў – цуд! 15 студзеня набірала нумар тэлефона ўвесь дзень, але было альбо занята, альбо аператар казаў: «Напрамак перагружаны». Толькі на наступны дзень а 8-й раніцы я пачула доўгія гудкі. Потым чакала 30 хвілінаў, каб пачуць аператара. Запісацца на найбліжэйшыя дні змагла толькі ў Баранавічы, у Менску прапаноўвалі даты на канец сакавіка, – апавядае мянчанка Хрысціна.

Падобныя гісторыі апавядаюць многія, хто без пасярэднікаў запісваўся на падачу дакументаў праз візавы цэнтр. Беларусы грашаць на пасярэднікаў – фірмы, якія за пэўную плату запісваюць вас у візавы цэнтр або ў консульства, рыхтуюць пакет дакументаў. Паслуга каштуе ад 40 да 100 рублёў. У сутнасці, фірмы бяруць грошы за дазвон у візавы цэнтр і падрыхтоўку дакументаў.

– У сувязі з падаражаннем візаў попыт на візы ўпаў прыкладна на 20%. І людзі, і агенцтвы цяпер знаходзяцца ў падвешаным стане. Усім зразумела, што з 2 лютага віза будзе каштаваць 80 еўраў. Але тыя, каму трэба яе рабіць тэрмінова, усё роўна звяртаюцца, – апавяла Паліна, старшая мэнэджарка адной з сталічных фірмаў, якія дапамагаюць аформіць візы. – Тыя, у каго сітуацыя не гарыць, аддаюць перавагу пачакаць да чэрвеня і зрабіць візу за 35 еўраў. Але зноў-такі 100% гарантыі, што з чэрвеня шэнген будзе каштаваць 35 еўраў, ніхто даць не можа!

Яшчэ некалькі сталічных кампаній гарантавалі нам 100% запіс у візавыя цэнтры на люты праз зніжэнне попыту. Хоць, ёсць падазрэнне, у найбліжэйшыя месяцы будзе нескладана падаць дакументы і без пасярэднікаў.

Што яшчэ зменіцца ў выдачы візаў?

– Паводле новага Візавага кодэкса, шматразовы шэнген можна атрымаць толькі пасля трох аднакратных, а раней дастаткова было зрабіць адну аднаразовую шэнгенскую візу. Але наколькі консульствы будуць прытрымлівацца гэтага правіла – невядома, – патлумачылі нам у фірме-пасярэдніцы. – Зрабіць нейкую выснову мы зможам толькі да сярэдзіны лютага.

Але ёсць некалькі і добрых навінаў. Па-першае, візы будуць выдаваць хутчэй – максімум за 10 дзён, а не 15, як цяпер. Па-другое, прасіць візу можна будзе за паўгода да паездкі (цяпер – за тры месяцы), прычым і запоўніць, і падаць усё ў электронным выглядзе. Па-трэцяе, Еўразвяз плануе выдаваць кароткачасовыя (да 7 дзён) візы проста на мяжы, але толькі ў краіну ўезду. Акрамя таго, Еўракамісія прапануе павялічыць выдачу шматразовых візаў тэрмінам ад 1 да 5 гадоў для падарожнікаў, якія часта прыязджаюць у Еўразвяз і маюць добрую візавую гісторыю (звычайна гэта наяўнасць некалькіх візаў і адсутнасць парушэнняў).