Ігар Кізіма: Спасылкі ў ноце МЗС Беларусі цяжка паддаюцца логіцы
20- 14.10.2020, 21:01
- 43,691
Амбасадар Украіны ў Беларусі пракаментаваў ноту лукашэнкаўскага МЗС.
Пералічаныя ў ноце МЗС Беларусі спасылкі пра нібыта парушэнні Украінай асобных базавых двухбаковых міждзяржаўных і міжурадавых пагадненняў цяжка паддаюцца логіцы, заявіў амбасадар Украіны Ігар Кізіма на сваёй старонцы ў «Фэйсбуку».
14 кастрычніка ён быў запрошаны ў МЗС Беларусі, дзе яму ўручылі ноту аб «недружалюбным, адкрыта дыскрымінацыйным кроку з боку Украіны ў сувязі з указам прэзідэнта Уладзіміра Зяленскага №420/2020, што тычыцца спрашчэння знаходжання і працаўладкавання беларускіх спецыялістаў ва Украіне».
У сваім каментары ўкраінскі дыпламат адразу абмовіўся, што сустрэча «насіла хоць і эмацыйны, але канструктыўны характар» і тычылася не толькі гэтага пытання.
«Але што тычыцца менавіта гэтага пытання, то ў мяне асабіста такая пастаноўка пытання выклікала пэўнае недастатковае разуменне, а пералічаныя ў ноце спасылкі пра нібыта парушэнне Украінай асобных базавых двухбаковых міждзяржаўных і міжурадавых пагадненняў цяжка паддаюцца логіцы», - падкрэсліў Кізіма.
Амбасадар звярнуў увагу, што ўказ быў прыняты ў сувязі са зваротамі тых беларускіх спецыялістаў, якімі было выказана жаданне працаваць ва Украіне і іх просьбамі стварыць для гэтага больш прымальныя ўмовы іх знаходжання.
«Пры гэтым відавочна, што калі такая просьба была выказана, значыць іх нешта не задавальняе ў сябе дома, у Беларусі. Яны захацелі з'ехаць у іншую краіну і відавочна, што ў сілу многіх абставінаў, Украіна для іх вельмі прывабны выбар (зразумелая мова, роднасныя сувязі, агульная адукацыя і г.д.). І Украіна гатовая такіх людзей прыняць. Так у чым жа тут «не дружалюбнасць». Як мне здаецца, гэта хутчэй акт дапамогі тым людзям, якім цяпер нялёгка ў Беларусі (хоць бы часова)», - адзначыў Кізіма.
«Як у гэтым кантэксце не ўспомніць указ прэзідэнта Беларусі №420 (супадзенне ў нумары, як той казаў, паказальнае) ад 2014 года, які тычыўся аказання дапамогі ўкраінцам, якія былі вымушаныя праз развязаную Расеяй вайну на ўкраінскім Данбасе бегчы, у тым ліку, і ў Беларусь. І гаворка цяпер не пра колькасць украінцаў, якіх прыняў братэрскі беларускі народ (дзякуй яму за кожнага ўкраінца), а пра гатоўнасць у цяжкі перыяд аказаць дапамогу тым, хто ў ёй мае патрэбу. А бізнэс, якой бы сферы ён не тычыўся, будзе заставацца і працаваць там, дзе створаны ўмовы для яго развіцця, сумленнай канкурэнцыі і атрымання прыбытку. І выключэнняў, як мне здаецца, тут няма», - падсумаваў украінскі амбасадар.
Указ «Аб некаторых мерах у прыцягненні прадпрымальнікаў, высокакваліфікаваных спецыялістаў, якія з'яўляюцца грамадзянамі Рэспублікі Беларусь» Уладзімір Зяленскі падпісаў 4 кастрычніка. Дакумент, які ўвайшоў у дзеянне з дня яго апублікавання, закліканы спрыяць развіццю інвестыцыйнага патэнцыялу Украіны і прыцягнення ў краіну беларускіх высокакваліфікаваных IT-спецыялістаў і інаватараў.
Прадугледжаны шэраг мер, у тым ліку спрошчанае афармленне права на часовае пражыванне для гэтых катэгорый беларусаў. Таксама будуць прызнаныя дакументы, выдадзеныя кампетэнтнымі органамі Беларусі, неабходныя для ажыццяўлення працоўнай дзейнасці ва Украіне.