Уночы беларусы змогуць пабачыць адзін з наймагутных метэорных струменяў года – Гемініды

Калі пашанцуе, мы ўбачым да 100-120 метэораў за адну гадзіну.

Сёння, уночы з 13 на 14 снежня, калі дазволіць надвор'е, беларусы змогуць убачыць метэорны струмень Гемініды. Пра гэта піша супольнасць ASTROBEL TEAM.

Штогод у сярэдзіне снежня Зямля перасякае шлейф часцінак, пакінутых праходжаннем астэроіда 3200 «Фаэтон». У гэты перыяд можна назіраць самы сапраўдны «зарапад».

Метэорны струмень Гемініды назіраецца штогод у перыяд з 4 снежня да 17 снежня, а максімум яго дзеянні ў 2020 годзе надыдзе ўночы 14 снежня. У гэты час жыхары Зямлі могуць назіраць да 100-120 метэораў за адну гадзіну.

Аднак так бывае не заўсёды. Так, у 2011-м планета Зямля перасекла досыць шчыльны збой часцінак, пакінутых «Фаэтонам». У той год у максімуме дзеяння метэорнага струменя Гемініды за адну гадзіну можна было назіраць да 200 метэораў.

Найлепшыя варункі назіранняў метэорнага струменю Гемініды надыходзяць бліжэй да паўночы, калі над усходнім гарызонтам ззяе сузор'е Блізняты. Адразу пасля паўночы сузор'е ўзнімаецца дастаткова высока над даляглядам і праходзіць блізка да зеніту, што дазваляе назіраць метэорны струмень ва ўсёй сваёй прыгажосці.

Пасля на змену Гемінідам прыйдуць метэорныя струмені Урсіды ды Квадрантыды. Максімум дзеяння метэорнага струменя Урсіды з дзясяткам назіраных метэораў за гадзіну надыдзе 22 снежня пры радыянце ў сузор'і Малой Мядзведзіцы, а максімум дзеяння метэорнага струменя Квадрантыды - 4 студзеня 2021 пры радыянце ў сузор'і Валапаса. У максімуме дзеяння гэтага метэорнага струменя можна будзе назіраць бязмала сотню метэораў за гадзіну.