Амерыканец паказаў, што каранавірус зрабіў з ягоным целам

Чатыры з паловай тыдні ён правёў на ШВЛ.

43-гадовы медбрат з Сан-Францыска Майк Шульц апублікаваў фота таго, як шэсць тыдняў каранавіруснай інфекцыі змянілі ягонае цела, піша CNN (пераклад - tut.by)

«Я хацеў паказаць, як дрэнна на арганізме адлюстроўваецца хвароба. Аб'ём маіх лёгкіх паменшыўся праз пнеўманію. Але з кожным днём я раблюся мацнейшым. Я вярнуся да той формы, у якой быў, і, магчыма, нават змагу рабіць кардыё», - так падпісаў фота Майк Шульц.

Амерыканец, які раней трэніраваўся амаль кожны дзень, схуднеў на 22 кг за час хваробы. Заразіўся каранавірусам ён пасля наведвання вечарынкі ў Фларыдзе. У мужчыны паступова развіўся кашаль, паднялася тэмпература. Калі ўзніклі праблемы з дыханнем, яго паклалі ў шпіталь. Чатыры з паловай тыдні медбрат правёў на ШВЛ.

«Пасля таго, як я прыйшоў у прытомнасць, я не пазнаў сябе, - распавёў ён CNN. - Практычна расплакаўся, калі зірнуў у люстэрка. І, вядома, было шокам даведацца, што правёў так шмат часу ў шпіталі". Цяпер Майк Шульц ідзе на папраўку.