Пад Гомелем 72-гадовы п'яны пенсіянер ініцыяваў пагоню

Мужчына праігнараваў патрабаванне інспектараў спыніцца і прадоўжыў рух.

Пад Гомелем п'яны пенсіянер ініцыяваў пагоню. Чым усё скончылася, расказалі tut.by у ДАІ.

Інцыдэнт адбыўся 13 сакавіка. Прыкладна ў 18.30 супрацоўнікі ДАІ звярнулі ўвагу на кіроўцу Volkswagen, які, ад'язджаючы ад крамы ў вёсцы Галееўка, не прышпіліўся.

Мужчына праігнараваў патрабаванне інспектараў спыніцца і прадоўжыў рух. Пачаўся пераслед. Кіроўца Passat на вялікай хуткасці накіраваўся ў бок вёскі Калінаўка. Ужо ў населеным пункце паказаў правы паварот, аднак так і не змог у яго ўвайсці, з'ехаў на збочыну, тут яго і затрымалі.

Сыходзіў ад пагоні 72-гадовы нецвярозы мясцовы жыхар.

– Цяпер не піў ні грама, да гэтага днём выпіў, – прызнаўся супрацоўнікам міліцыі пенсіянер.

На яго склалі два адміністрацыйныя пратаколы.