Як зберагчы сябе і блізкіх у спякоту

Рэкамендацыі Міністэрства аховы здароўя.

У Беларусі захоўваецца гарачае надвор'е, у сувязі з чым Міністэрства аховы здароўя нагадвае, што высокая тэмпература, як на адкрытай мясцовасці, так і ў памяшканнях, можа негатыўна адбіцца на стане здароўя людзей. Яна можа прывесці да абвастрэння хранічных захворванняў, а ў шэрагу выпадкаў - да перагрэву арганізма і рэзкага пагаршэння здароўя.

Для абароны сябе і блізкіх трэба абмежаваць знаходжанне на дварэ, знізіць фізічныя нагрузкі. Памяшканні трэба праветрываць, па магчымасці дадаткова ўключыць вентылятары або кандыцыянеры.

Пры выхадзе на двор рэкамендуецца надзяваць лёгкае адзенне з натуральных тканін светлай расфарбоўкі, пажадана, каб каўнер адзення быў не тугім. На дварэ абавязкова карыстацца галаўным уборам, сонцаахоўнымі акулярамі, парасонамі.

Каб пазбегнуць абязводжвання, трэба піць вялікую колькасць вадкасці: гарбаты, мінеральнай вады, морсу, малочнакіслых напояў, адвараў з сухіх пладоў, вітамінізаваных напояў, выкарыстоўваць кіпячоную або бутыляваную ваду. Газаваных напояў і вадкасцяў з павышаным утрыманнем цукру, энэргетычных і алкагольных напояў лепш пазбягаць.

Актуальныя правілы асабістай гігіены: старанна мыць рукі з мылам пасля вяртання дадому знадворку, перад ежай і пасля наведвання прыбіральні.

Рэкамендуецца выкарыстоўваць пры транспартаванні і захоўванні прадуктаў харчавання чыстую ўпакоўку (поліэтылен, паперу, кантэйнеры для харчовых прадуктаў і г.д.), для скорапсавальных харчовых прадуктаў - торбу-лядоўню альбо хладагент.

На адпачынку важна купацца толькі ў бяспечных вадаёмах, імкнуцца не заглынаць ваду і растлумачыць гэта дзецям.

Пры першых сімптомах перагравання (вільготная счырванелая скура, слабасць, млявасць, дрымотнасць, галаўны боль, смага, пачашчэнне пульса і дыхання, млоснасць) і прыкмет харчовага атручвання (болі ў жываце, ваніты, дыярэя) варта неадкладна звярнуцца да лекара.