Амбасада ЗША: У рэжыму ў Беларусі адзінае выйсце - вызваліць усіх палітвязняў

Дыпламаты выступілі з цвёрдай заявай.

ЗША асудзілі рэйды беларускіх уладаў супраць, прынамсі, 19 няўрадавых арганізацый, гаворыцца ў паведамленні прэс-службы амбасады Злучаных Штатаў у Беларусі ў Facebook.

«Нястомная кампанія рэжыму Лукашэнкі ў крыміналізацыі незалежных меркаванняў, праваабаронцаў і грамадзянскай супольнасці з'яўляецца абуральнай і выключнай з'явай у сучаснай Еўропе і прычынай міжнароднай ізаляцыі Беларусі», - заявіла амбасадарка ЗША ў Беларусі Джулі Фішэр.

У заяве амбасады гаворыцца, што «адзіны выхад з палітычнага крызісу ў Беларусі - спыніць рэпрэсіі і вызваліць усіх палітвязняў».

Нагадаем, апошняя хваля ператрусаў і арыштаў закранула карпункт амерыканскай службы «Радыё Свабода». Затрыманыя Інэса Студзінская, Алег Груздзіловіч, дакладнай інфармацыі няма аб Валянціне Жданко і Алесі Дашчынскім.