21 кастрычнiка 2021, Чацвер, 1:03
Сім сім, Хартыя 97!
Рубрыкі

У Менску і рэгіёнах скасавалі некалькі маршрутаў грамадскага транспарту

6
У Менску і рэгіёнах скасавалі некалькі маршрутаў грамадскага транспарту

Пасажыры незадаволеныя.

Жыхары Менска і рэгіёнаў скардзяцца на тое, што прадпрыемствы-перавозчыкі скасавалі ў выходныя дні некалькі маршрутаў грамадскага транспарту. Цяпер людзі не ведаюць, як у гэтыя дні даехаць да патрэбнай ім мясцовасці, і «варожаць» пра прычыны таго, што адбылося, паведамляе zerkalo.io.

Нядаўна мы паведамлялі, што «праз востры недахоп кіроўцаў» у аўтапарку Дзяржынска былі прыпыненыя некаторыя гарадскія аўтобусныя рэйсы. Гэтым летам аўтапарк таксама прыпыняў некалькі прыгарадных і міжгародніх рэйсаў. На прадпрыемстве на працягу некалькіх гадоў казалі пра тое, што ім не ўдаецца развязаць кадравае пытанне.

Пару дзён таму менчукі паведамлялі пра тое, што не могуць дачакацца сталічнага наземнага транспарту на некалькіх маршрутах. Выявілася, што ў канцы ліпеня - пачатку жніўня ГП «Мінсктранс» скасаваў і прыпыніў працу некаторых рэйсаў. Напрыклад, у выхадныя перасталі працаваць тры тралейбусныя (25, 39, 43) і столькі ж аўтобусных маршрутаў (79, 89э, 131), а таксама адзін трамвайны №7. Скасаваныя маршруты і змены ў раскладзе ёсць таксама ў прыгарадных, міжгародніх і міжнародных рэйсах. На прадпрыемстве просяць пасажыраў даведвацца актуальны расклад у дзень паездкі.

Пры гэтым скасаванне гарадскіх рэйсаў выклікала абурэнне ў людзей: пра гэта яны паведамляюць не толькі журналістам, але і пішуць на сайце ГП «Сталічны транспарт і сувязь». Зрэшты, афіцыйных адказаў пад гэтымі каментарамі няма.

- Мне трэба заехаць з 3апад-3 у Малінаўку. Я 30 хвілін на прыпынку чакаў 25 тралейбус. Прыйшлося сесці на 140 аўтобус і ехаць з перасадкамі. Патэлефанаваў у «Мінсктранс», каб даведацца, у чым справа. Мне адказалі, што з 31 ліпеня ў выхадныя ён скасаваны. Аўтобус 30С у той бок ходзіць, але не тым маршрутам. А праязны безлімітны я купляў на тралейбус, а не на аўтобус, - паведаміў Zerkalo.io чытач Пётр Заруцкі.

Ён мяркуе, што прычын такога рашэння можа быць некалькі: недахоп кіроўцаў, эканомія электрычнасці, недахоп грошай.

Магчыма, меркаванне пасажыра не беспадстаўнае, бо ва ўсе транспартныя паркі ГП «Менсктранс» патрабуюцца супрацоўнікі, у тым ліку кіроўцы. Што тычыцца недахопу грошай, то раней Мінфін паведамляў, што дэфіцыт рэспубліканскага бюджэту за паўгода вырас амаль да 1,6 мільярда рублёў. За чэрвень гэты паказчык павялічыўся на 585,2 мільёна рублёў. Магчыма, гэта адбілася і на грамадскім транспарце, які субсідуецца з дзяржаўнай казны.

У «Менаблпасажыртранс» адказалі «Ежедневнику», што рашэнне аб татальным скарачэнні прыгарадных маршрутаў, гранічныя максімальныя тарыфы на прыгарадныя перавозкі рэгулююцца заканадаўствам Беларусі і не адпавядаюць фактычным выдаткам перавозчыка. Пакрыццё часткі выдаткаў ажыццяўляецца за кошт субсідый, прадугледжаных мясцовымі бюджэтамі.

«З прычыны адсутнасці дадатковага бюджэтнага фінансавання на пакрыццё перавозчыку выдаткаў на выкананне прыгарадных аўтамабільных перавозак пасажыраў у рэгулярных злучэннях, аднаўленне вышэйзгаданых маршрутаў не ўяўляецца магчымым», - гаворыцца ў адказе прадпрыемства.

З якой прычыны скасавалі некаторыя нядзельныя маршруты ў Менску, у ГП «Сталічны транспарт і сувязь» не паведамілі, але параілі звярнуцца з запытам. Калі адказ на яго будзе атрыманы, мы яго размесцім.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».