Сяргей Дылеўскі: Мы прапануем перамовы
9- 12.09.2021, 21:43
- 12,750
У іх можа быць выхад з сітуацыі, якая склалася.
Лідар Беларускага аб'яднання працоўных Сяргей Дылеўскі распавёў пра патрабаванні, якія былі выстаўленыя ўладам рабочымі:
- Гэта вызваленне палітвязняў, незаконна арыштаваных. Гэта самае важнае патрабаванне, якое падлягае безумоўнаму выкананню. Свабоду для незалежных СМІ - краіна павінна ведаць праўду. Урэгуляванне заробкаў, пенсій, каб яны адпавядалі пражытковаму мінімуму, каб чалавек мог пражыць месяц без падзаробкаў. Асабліва пенсіянеры, якія сваё жыццё прысвяцілі працы на дзяржаву. І гэтыя людзі вартыя таго, каб на пенсіі не працаваць, а адпачываць. І самае галоўнае патрабаванне - гэта перамовы. Былі на наш адрас каментары: якія могуць быць перамовы са злачынцам, толькі суд Лінча, толькі Гаага. Мы бачым у перамовах выхад з сітуацыі, якая склалася.
Я выдатна разумею, што за сабой можа пацягнуць забастоўка, калі яна адбудзецца. І чым даўжэй яна будзе доўжыцца, тым горш для краіны, для эканомікі краіны. І мы прапануем перамовы, не Сашу вусатаму, а ягонаму непасрэднаму найбліжэйшаму атачэнню. Там недурныя людзі. Мы прапануем сесці за стол перамоваў і дамовіцца аб новых прэзідэнцкіх выбарах, аб парламенцкіх выбарах, аб перадачы ўлады, аб развязанні палітычнага і эканамічнага крызісу ў краіне, пазбегнуўшы забастоўкі, у цывілізаваным ключы. Калі ўлады на гэта не пойдуць, то забастоўка - гэта крайні захад, і мы павінны будзем яе пачаць.